प्रमुख तीन पार्टीप्रति बाबुरामको कटाक्ष : ३० वर्षसम्म देशलाई ठगेर खाए
काठमाडौँ , माघ २७ गते। नेपाल समाजवादी पार्टी(नयाँ शक्ति)का संयोजक डा.बाबुराम भट्टराईले ३० वर्षसम्म कांग्रेस, एमाले र माओवादीहरूले देश र जनतालाई ठगेको आरोप लगाएका छन् । आइतबार नेसपा (नयाँ शक्ति) को प्रथम महाधिवेशन उद्घाटन समारोहलाई सम्बोधन गर्दै भट्टराईले वैकल्पिक शक्तिले नयाँ विचारको संश्लेषण गरेर जानुपर्ने बताए ।
‘कांग्रेसले गरेनन् । कम्युनिस्टले गरेनन् । यी नै तीन वटा टाउकेहरूले ३० वर्षसम्म खाइराखेका छन् । जनताले पनि सत्तामा बस्नेले केही गरेनन् बाहिर बस्नेले गर्छन् कि भन्छन् । फेरि तिनकै पछि लागेका छन् । त्यसले फेरि ठग्छ । पटक–पटक यी तीन वटा टाउकाहरूले ठगेका छन् । यिनले देशलाई हैरान पारिराखेका छन्’, प्रमुख तीन पार्टीलाई लक्षित गरी उनले भने ।
उनीहरूले सत्तामा बस्दासम्म उत्पातै गरेको दाबी गर्ने तर सत्ताबाट बाहिरिएपछि केही भएन भन्ने सोचबाट नयाँ शक्ति मुक्त हुनुपर्ने उनले स्पष्ट पारे । वैकल्पिक शक्तिले पनि डेन्टिङ पेन्टिङ गरेर पुरानै तरिकाले गए मन्त्री तथा प्रधानमन्त्री पनि बन्न सक्ने तर यसले राजनीतिक निकास ननिक्लने उनको बुझाइ छ ।
‘नयाँ वैकल्पिक शक्तिहरूले पनि डेन्टिङ पेन्टिङ गरेर राज्यको विभिन्न पदमा पुग्न सक्छन् । प्रचण्ड जस्तै चलाख व्यक्ति भए प्रधानमन्त्री पनि भइन्छ’, उनले भने, ‘वैकल्पिक विचारको संश्लेषण आवश्यक छ । विचार संश्लेषण गरेर जनतामा जानुपर्छ । विचार नै प्रस्ट नभएसम्म नयाँ अभियान पुरा हुँदैन ।’