न्याय सम्पादनमा न्यायालय चुक्नु हुँदैन : प्रधानन्यायाधीश राउत
घोराही, चैत ३ गते । प्रधानन्यायाधीश प्रकाशमान सिंह राउतले न्याय सम्पादनमा न्यायालय चुक्न नहुने बताउनुभएको छ । मङ्गलवार घोराही आउनुभएका प्रधानन्यायाधीश राउतले निष्पक्ष न्याय सम्पादनको काममा न्यायाधीश र कर्मचारी जिम्मेवार हुन जरुरी रहेको बताउनुभएको हो ।
त्यसका लागि पुरानो सोच र चिन्तनलाई छोडी निष्पक्ष र प्रभावकारी न्याय सम्पादनमा जोड दिनुपर्ने उहाँले बताउनुभयो । सेवाग्राहीलाई हिजोको भन्दा फरक तरिकाले व्यवहार गर्ने बेला आएको भन्दै प्रधानन्यायाधीश राउतले भन्नुभयो, “हिजोको दिनमा केही कमजोरी भएको रहेछ भने पनि अब सुधार्दै अघि बढ्नुपर्छ । हिजोभन्दा अझ राम्रो काम गर्ने बेला आएको छ । हामीले आफैँभित्र निर्मम समीक्षा गर्दै अघि बढ्नुपर्छ ।” समाजमा असल मानिसहरू पनि छन् भन्ने सन्देश दिने गरी काम गर्न प्रधानन्यायाधीश राउतले न्यायाधीश र कर्मचारीलाई आग्रह गर्नुभयो ।
अदालतप्रतिको विश्वास बढाउन न्याय सम्पादनमा निष्पक्षता र प्रभावकारिता जरुरी रहेको धारणा उहाँले राख्नुभयो । उहाँले अदालत चलेपछि सबै कार्यालय चलायमान हुने भएकाले अदालत नियमित चलायमान हुनुपर्ने बताउनुभयो ।
यसैबिच जेन–जी आन्दोलनका क्रममा दाङ जिल्ला अदालतलाई क्षति हुनबाट जोगाउन महत्त्वपूर्ण भूमिका निर्वाह गर्ने प्रहरी हवल्दार सङ्गीता अधिकारीलाई सम्मान गरिएको छ । कार्यक्रममा प्रधानन्यायाधीश राउतले प्रहरी हवल्दार अधिकारीलाई नगद २५ हजार रुपियाँसहित प्रशंसापत्र प्रदान गर्नुभयो । सामाजिक सञ्जालमार्फत अधिकारीको योगदानबारे जानकारी पाएपछि प्रत्यक्ष भेटेर सम्मान गर्ने इच्छा पूरा भएको भन्दै प्रधानन्यायाधीश राउतले न्यायालयप्रति जनताको आस्था र विश्वास जोगाइराख्न सबै पक्षको जिम्मेवार भूमिका आवश्यक रहेको बताउनुभयो ।
भदौ २३ र २४ को आन्दोलनका क्रममा देशभरका २३ वटा अदालतमा क्षति पुगेको भन्दै क्षतिग्रस्त संरचनाको पुनःस्थापना गरेर न्याय सेवा दिने काम भइरहेको उहाँले बताउनुभयो । त्यस क्रममा उहाँले दाङ जिल्ला अदालत घोराहीसँगै उच्च अदालत तुलसीपुरको समेत निरीक्षण गर्नुभयो ।