विद्याथीलाई लागु औषध नियन्त्रण र साइबर सुरक्षा सम्बन्धी सचेतना
राधा लुइटेल / फिदिम, असार १२ गते । पाँचथरको फाल्गुनन्द गाउँपालिका वडा १ स्थित सिद्धदेवी माध्यमिक विद्यालयमा लागुऔषध दुरुपयोग नियन्त्रण तथा साइबर अपराध सम्बन्धी सचेतनामूलक कार्यक्रम सम्पन्न भएको छ ।
जिल्ला प्रशासन कार्यालय पाँचथरले विद्यालयका शिक्षक, शिक्षिका तथा विद्यार्थीहरूलाई लक्षित गर्दै उक्त कार्यक्रमको आयोजना गरिएको हो ।
कार्यक्रममा मुख्य प्रशिक्षकका रूपमा रहनुभएका प्रहरी नायब उपरीक्षक (प्रनाउ) अनिशकुमार कर्णले सहभागीहरूलाई लागुऔषधको कुलतले पार्ने शारीरिक, मानसिक तथा सामाजिक असर र यसका कानुनी पक्षहरूका बारेमा जानकारी गराउनुभएको थियो ।
बढ्दै गएको साइबर अपराधको जोखिम, सामाजिक सञ्जालको सुरक्षित प्रयोग गर्ने उपाय र इन्टरनेट बैंकिङ तथा डिजिटल कारोबार गर्दा अपनाउनुपर्ने सावधानीका बारे प्रशिक्षण दिइएको प्रहरीले हो ।
‘लागुऔषधबाट टाढा रहौं, साइबर अपराधबाट सचेत बनौं’ भन्न नारा सहित सञ्चालित सो कार्यक्रममा कर्णले युवा पुस्ता र विद्यार्थी वर्ग समाजको मेरुदण्ड भएकाले डिजिटल जगत र कुलतको सही पहिचान गरी सचेत रहन आग्रह गर्नुभयो ।
कार्यक्रममा विद्यालयका प्रधानाध्यापक, शिक्षक शिक्षिकाहरू तथा विद्यार्थीहरूको उपस्थिति रहेको थियो । विद्यालय प्रशासनले यस किसिमको व्यावहारिक र समयसान्दर्भिक सचेतना कार्यक्रमले विद्यार्थीहरूलाई कुलत र अनलाइन ठगीबाट बच्न ठुलो सहयोग पुग्ने विश्वास व्यक्त गरेको छ ।
यसैबिच फिदिम नगरपालिका १ स्थित फिदिम माध्यामिक विद्यालयका विद्यार्थीलाई पनि साइवर सुरक्षा र लागु औषध नियन्त्रण सम्वन्धि सचेतना दिइएको छ । लागु औषध दुव्र्यसन विरुद्धको अभियान अन्तरगत कार्यक्रम आयोजना गरिएको बताइएको छ ।