प्रतिफल दिने क्षेत्रमा मात्रै ऋण लगानी गर्छौँ :अर्थमन्त्री वाग्ले
काठमाडौँ, असार २५ गते । अर्थमन्त्री डा.स्वर्णिम वाग्लेले वर्तमान सरकारले प्रतिफल दिने ठाउँमा मात्रै ऋण लगानी गर्ने बताउनुभएको छ ।
बिहीबार बसेको राष्ट्रिय सभाको बैठकमा भएको राष्ट्र ऋण उठाउने विधेयक, २०८३ माथिको दफावार छलफलका क्रममा सांसदले उठाएको प्रश्नको जवाफ दिने क्रममा उहाँले यस्तो बताउनुभएको हो ।
उहाँले विगतमा अनुत्पादक क्षेत्रमा ऋण लगानी गर्दा सार्वजनिक ऋणको भार बढेको बताउनुभयो । पछिल्लो सातआठ वर्षमा वार्षिक औसत १८ प्रतिशतका दरले बढेको उहाँको भनाइ छ ।उहाँले आवश्यक र प्रतिफलमुखी क्षेत्रमा ऋण लिनैपर्ने बताउनुभयो।
ऋण लिनु आफैँमा गलत नभएको स्पष्ट पार्दै उहाँले उत्पादनशील क्षेत्रमा लगानीका लागि लिइने ऋणले अर्थतन्त्रको आकार विस्तार गर्न सहयोग गर्ने उल्लेख गर्नुभयो ।
आगामी वर्षमा सरकारले करिब साढे छ खर्ब रुपियाँ ऋण उठाउने योजना बनाएको जानकारी दिँदै अर्थमन्त्री वाग्लेले त्यसको ठुलो हिस्सा पुरानो ऋणको साँवा भुक्तानीमै खर्च हुने बताउनुभयो ।
उहाँका अनुसार ४१० अर्ब रुपियाँ आन्तरिक ऋण उठाइने छ भने २४६ अर्ब रुपियाँ आन्तरिक ऋण तिर्न प्रयोग हुने छ । त्यस्तै, २४७ अर्ब रुपियाँ वैदेशिक ऋण लिइने र ७२ अर्ब रुपियाँ वैदेशिक ऋण भुक्तानी गरिने छ ।
उहाँले वर्तमान सरकार बन्दै गर्दा कुल सार्वजनिक ऋण करिब ३० खर्ब रुपियाँ रहेको र अब ३३ खर्ब रुपियाँ पुग्ने अनुमान गरिएको बताउनुभयो ।उहाँले ६६ खर्ब रुपियाँ बराबर रहेको अर्थतन्त्रलाई ७४ खर्ब रुपियाँसम्म विस्तार गर्ने लक्ष्य रहेको पनि जानकारी दिनुभयो ।
उहाँले साँढे छ खर्ब ऋण लिएपनि ऋण–जिडिपी अनुपात (डेब्ट टु जिडिपी रेसियो) भने स्थिर रहने दाबी गर्नुभयो । उहाँले कर बढाएकोमा पनि र ऋण लिएको पनि विरोध नगर्न सांसदलाई आग्रह गर्नुभयो ।
राजस्वले मात्रै देश चलाउन मुस्किल हुने भएकोले ऋण लिनैपर्ने बाध्यता रहेको उहाँको भनाइ छ । उहाँले हालै पनि एडिबीसँग दुई महत्त्वपूर्ण परियोजनाको लागि ऋण सम्झौता गरेको जानकारी दिनुभयो ।
एकीकृत खानेपानी तथा ढल व्यवस्थापन र भन्सार तथा आपूर्ति व्यवस्थापनका लागि २५ अर्ब रुपियाँ बराबरको ऋण लिएको बताउनुभयो ।