सरकारले काठमाडौंमा शनिबार दिनभर बेच्यो ६ हजार ८०२ सिलिन्डर ग्यास; भोलि ७ ठाउँमा ग्यास बिक्री गरिने
काठमाडौँ, साउन ३० गते । सरकारले शनिबार दिनभरिमा काठमाडौंका ५ बिक्री केन्द्रबाट कुल ६ हजार ८ सय २ वटा खाना पकाउने ग्यास सिलिन्डर ग्यास बेचेको छ ।
एक महिनादेखि ग्यास नपाएका उपभोक्तालाई राहत दिने भन्दै नेपाल आयल निगमले आजदेखि काठमाडौंका ५ स्थानमा काठमाडौं जिल्ला प्रसाशन कार्यालयको समन्वयमा बिक्री केन्द्र तोकेको थियो ।
ग्यास नपाएका उपभोक्ता ठूलो संख्यामा बिहान ८ बजेदेखि नै यी बिक्री केन्द्रमा लाइन लागेका थिए । आयल निगमको तथ्यांकअनुसार निगमको टेकु परिसरबाट सबैभन्दा बढी २ हजार २ सय ९० वटा ग्यास वितरण भएको छ ।
यसैगरी पुरानो जिल्ला प्रशासन कार्यालय बबरमहलबाट १ हजार ६ सय, कीर्तिपुरको राधास्वामी केन्द्रबाट ७ सय ६२, यातायात कार्यालय परिसर चाबहिलबाट ७ सय २० र बसुन्धराको राधास्वामी केन्द्रबाट ६ सय वटा सिलिन्डर बिक्री भएको छ ।
यी ५ केन्द्रबाट मात्रै ५ हजार ९ सय ७२ सिलिन्डर बिक्री हुँदा बालाजु काउन्टरबाट ५ सय र साल्ट ट्रेडिङको जडिबुटी तथा कालीमाटी काउन्टरबाट ३ सय ३० गरी कुल ६ हजार ८ सय २ सिलिन्डर ग्यास उपभोक्ताको हातमा पुगेको छ ।
कुन ब्रान्डको ग्यास कति बेचियो भन्ने तथ्यांकलाई हेर्दा ५ मुख्य केन्द्रबाट सबैभन्दा धेरै नेपाल ग्याँस १ हजार ७ सय ६० वटा बिक्री भएको छ ।
त्यसैगरी एभरेष्ट/सुगम १ हजार ४३ वटा, एचपी ७ सय ८० वटा, हिमाल ५ सय ४० वटा, सगर ४ सय ६४ वटा र श्रीराम ब्रान्डका ३ सय २७ वटा ग्याँस बिक्री भएका छन् ।
त्यस्तै, एसटीसी ३ सय २०, श्री २ सय ८०, ओम १ सय ४०, भानु ८०, साईबाबा/श्रीकृष्ण ७०, श्रीमाया ६२, लोकप्रिय ५३ र सूर्य ब्रान्डका ५३ वटा सिलिन्डर वितरण गरिएका छन् ।
सरकारले करिब ७ हजार सिलिन्डर ग्यास बेचेको तथ्यांक प्रस्तुत गरिरहँदा धेरै उपभोक्ताले भने ग्यास नपाएर रित्तो हात फर्किनु परेको गुनासो गरेका छन् ।
भोलि उपत्यकाका ७ ठाउँमा एलपी ग्यास बिक्री गरिने
भोलि आइतबार उपत्यकाका ७ ठाउँमा खाना पकाउने ग्यास बिक्री वितरण हुने भएको छ । नेपाल आयल निगमको समन्वयमा ग्यास उद्योगहरूले ग्यास बिक्री गर्ने भएका छन् ।
आयल निगमले आम उपभोक्ताका लागि सार्वजनिक गरेको सूचना अनुसार आयल निगमको कार्यालय टेकु परिसर, पशुु सेवा शाखा चपली, राधास्वामी कीर्तिपुर, तारकेश्वर नगरपालिका परिसर, नयाँबजार जुडो हल परिसर, चन्द्रागिरी नगरपालिका कार्यालय र राष्ट्रिय क्षयरोग केन्द्र ठिमीमा ग्यास सिलिन्डर बिक्री वितरण हुनेछ ।
अति आवश्यक परेका व्यक्तिले मात्र आफ्नो नागरिकता वा राष्ट्रिय परिचयपत्रसहित आएर ग्यास किन्न निगमले भनेको छ ।
ग्यास बिक्री वितरण हुने समय बिहान ११ बजेदेखि साँझ ५ बजेसम्मलाई तोकिएको छ ।