मकैको खोस्टाबाट फूल र ब्याच बनाउने तालिम
राधा लुइटेल / फिदिम फागुन १० गते। पाँचथरको फालेलुङ गाउँपालिकामा सुकेको मकैका खोस्टाबाट फूल र ब्याच बनाउने तालिम आयोजना गरिएको छ।
सात दिनसम्म चलेको तालिममा मकैका खोस्टा काटेर उपहार दिन, घर तथा कार्यालयका टेबुलमा सजाउन र कार्यक्रमका अतिथिलाई सत्कार गर्न प्रयोग हुने ब्याच निर्माण गर्न सिकाइएको गाउँपालिकाका प्रवक्ता भरत खपाङ्गी मगरले बताउनुभयो।
घरेलु तथा साना उद्योग कार्यालय पाँचथरको आयोजनामा, फालेलुङ–५ नम्बर वडा र फालेलुङ सामुदायिक होमस्टे व्यवस्थापनमा तालिम दिइएको वडाध्यक्ष मगरको भनाइछ।
तालिममा १७ जना सहभागीले मकैको खोस्टाबाट फूल र ब्याज बनाउने सीप हासिल गरेका छन्। वडाध्यक्ष मगरका अनुसार फालेलुङ गाउँपालिकामा आयातित खादा र ब्याच प्रयोग गर्न प्रतिबन्ध लगाइएको छ।
आयातित खादा र ब्याचको विकल्पमा अब खोस्टाबाट बनेको फूल र ब्याच प्रयोग गरिने तालिमको समापन समारोह प्रमुख अतिथि गाउँपालिका अध्यक्ष वीरविक्रम थाम्सुहाङले बताउनुभयो।
‘अब खोस्टाबाट बनेको फूल गाउँपालिकाले पालिकाभित्र आयोजना हुने उत्सव, महोत्सव र सार्वजनिक कार्यक्रममा प्रयोग गर्छौ’, अध्यक्ष थाम्सुहाङले भन्नुभयो। यसअघि जिल्लाको फाल्गुनन्द गाउँपालिकाले खोस्टाको फूल बनाउने तालिम सञ्चालन गरेको थियो।