नौ महिनामा साढे १३ हजार पर्यटकले गरे राराको अवलोकन
राजन रावत / हुम्ला, जेठ २ गते । पर्यटकीय क्षेत्र रारा तालमा पछिल्लो नौ महिनामा साढे १३ हजारभन्दा बढी आन्तरिक तथा बाह्य पर्यटकहरूले अवलोकन गर्नुभएको छ । रारा घुम्ने सिजन सुरु भएसँगै पहिल्ला दिनमा आन्तरिक पर्यटकहरूको चाप बढेको हो ।
रारा राष्ट्रिय निकुञ्ज कार्यालयका अनुसार पछिल्लो नौ महिनामा १३ हजार ५४५ जना आन्तरिक तथा बाह्य पर्यटकले रारा अवलोकन गरेका छन् । यी पर्यटकहरू हवाई र सडक मार्गबाट रारा जाने गर्दै आउनुभएको छ ।
समुद्री सतहदेखि दुई हजार नौसय मिटर उचाइमा रहेको रारा तालमा पछिल्लो समय आन्तरिक पर्यटकको रोजाइमा पर्नेगरेको छ । रारा ताल डुङ्गा व्यवसायी सङ्घका अध्यक्ष विष्णुबहादुर रावलका अनुसार एक दिनमा डेढ सयसम्म आन्तरिक पर्यटकहरू अवलोकनका लागि ताल आउने गर्नुभएको छ । उहाँले बाह्यभन्दा आन्तरिक पर्यटकहरूको बढी रोजाई रारा भएको बताउनुभयो ।
अझ सरकारले दुई दिन सार्वजनिक बिदा दिन थालेपछि झन पर्यटकहरूको चाप बढेको छ । काठमाडौँ, पोखरा, चितवन, नेपालगन्ज, सुर्खेतबाट पनि पर्यटकहरू बस रिजर्भ गरेर आउने गर्नुहुन्छ । यसले रारा क्षेत्रमा स्थापना गरिएका होटलहरू पनि भरिभराउन हुने गरेको छ ।
रारा प्रवेश मार्गबाट ८० वटा घोडाको व्यवस्था गरिएको छ । जसलेगर्दा सो स्थानबाट रारा तालसम्म पर्यटकहरूलाई पुग्न सहज हुनेगरेको अधयक्ष रावलले बताउनुभयो ।