ज्येष्ठ नागरिकको मुख तथा दन्त स्वास्थ्य प्रवर्द्धन गर्न पुस्तान्तरण केयर र हिमाल डेन्टल अस्पतालबीच सम्झौता

काठमाडौं / भदौ १६: नेपालमा सम्मानजनक तथा मर्यादित वृद्धावस्थाको प्रवर्द्धनका लागि कार्यरत पुस्तान्तरण केयर र हिमाल डेन्टल अस्पताल एन्ड इन्स्टिच्युट अफ डेन्टल साइन्सबीच ज्येष्ठ नागरिकको मुख तथा दन्त स्वास्थ्य, दन्त स्वच्छता तथा सहज र पहुँचयोग्य दन्त उपचार सेवा प्रवर्द्धन गर्ने उद्देश्यले समझदारीपत्र (MoU) मा हस्ताक्षर भएको छ।

समझदारीपत्रमा आज पुस्तान्तरण केयरका संस्थापक प्रतिवेदन बैद्य र हिमाल डेन्टल अस्पतालका प्रबन्ध निर्देशक डा. राजेन्द्र भट्टले हस्ताक्षर गरेका हुन्।

सम्झौताअनुसार हिमाल डेन्टल अस्पतालले पुस्तान्तरण केयरका योग्य सदस्य ज्येष्ठ नागरिकलाई प्राथमिकताका आधारमा सहुलियत तथा छुटसहित दन्त उपचार सेवा उपलब्ध गराउनेछ। साथै, ज्येष्ठ नागरिकका लागि दन्त परीक्षण तथा स्क्रिनिङ शिविर, मुख स्वास्थ्य जाँच, जनचेतनामूलक कार्यक्रम तथा थप उपचार आवश्यक पर्ने व्यक्तिलाई उपयुक्त स्वास्थ्य संस्थामा रेफर गर्ने व्यवस्था पनि गरिनेछ।

सहकार्यअन्तर्गत दन्त परामर्श तथा परीक्षण, मौखिक स्वास्थ्य स्क्रिनिङ, स्केलिङ तथा ओरल प्रोफाइलेक्सिस, निवारक तथा पुनर्स्थापना उपचार, डेन्चर तथा प्रोस्थेटिक सेवा, गिजासम्बन्धी उपचार, ओरल सर्जरीलगायत अस्पतालबाट उपलब्ध हुने विभिन्न दन्त सेवामा ज्येष्ठ नागरिकको पहुँच विस्तार गरिनेछ।

त्यसैगरी, दुवै संस्थाले ज्येष्ठ नागरिकलाई दाँत तथा मुखको सरसफाइ, गिजाको रोग, दाँत झर्ने समस्या, डेन्चरको हेरचाह, पोषण तथा नियमित दन्त परीक्षणको महत्वबारे सचेतना अभिवृद्धि गर्न संयुक्त कार्यक्रम सञ्चालन गर्नेछन्। सीमित गतिशीलता भएका ज्येष्ठ नागरिकलाई लक्षित विशेष पहुँच तथा outreach कार्यक्रम सञ्चालन गर्ने विषयमा समेत सहकार्य गरिनेछ।

समझदारीपछि बोल्दै पुस्तान्तरण केयरका संस्थापक प्रतिवेदन बैद्यले मौखिक स्वास्थ्यलाई मर्यादित वृद्धावस्थाको अभिन्न अंगका रूपमा स्थापित गर्न यो सहकार्य महत्वपूर्ण रहेको बताए। उनले भने, “स्वस्थ वृद्धावस्था भनेको दीर्घरोगको व्यवस्थापन मात्र होइन। पोषण, सञ्चार, आत्मविश्वास र जीवनको समग्र गुणस्तरका लागि मौखिक स्वास्थ्य पनि उत्तिकै महत्वपूर्ण छ। यस सहकार्यले ज्येष्ठ नागरिकलाई सहज, किफायती, सम्मानजनक र मर्यादित रूपमा दन्त उपचार सेवा प्राप्त गर्न सहयोग पुग्नेछ।”

सम्झौताअनुसार दुवै संस्थाले दन्त शिविर तथा स्वास्थ्य सचेतना कार्यक्रम सञ्चालन, सेवामा पहुँच सहज बनाउने, स्रोत परिचालन तथा साझेदारीका सम्भावना खोज्ने र सहकार्यको प्रभावकारिताको समय–समयमा समीक्षा गर्नेछन्।

ज्येष्ठ नागरिकको स्वास्थ्य र मर्यादित जीवन सुनिश्चित गर्ने उद्देश्यले गरिएको यो सहकार्यले नेपालमा स्वस्थ, आत्मविश्वासी र सम्मानजनक वृद्धावस्थाको प्रवर्द्धनमा योगदान पुर्‍याउने अपेक्षा गरिएको छ।