सर्वोच्चको निस्साबाटै आधा जितिसक्यौं, न्याय पाउने विश्वास छ : देउवा
काठमाडौं, भदौ २४ गते । नेपाली कांग्रेसका पूर्वसभापति शेरबहादुर देउवाले पार्टीको आधिकारिकतासम्बन्धी मुद्दा पुनरावलोकनका लागि सर्वोच्च अदालतले दिएको अनुमतिबाटै आधाभन्दा बढी विजय भइसकेको दाबी गरेका छन् ।
कांग्रेस भक्तपुरले बुधबार १३३ औं बीपी जयन्तीको अवसरमा आयोजना गरेको विचार गोष्ठीलाई सम्बोधन गर्दै उनले सर्वोच्चबाट निस्सा पाएसँगै आधाभन्दा बढी विजय भइसकेको दाबी गरेका हुन् ।
निर्वाचन आयोगले दबाबमा विशेष महाधिवेशन पक्षधरलाई मान्यता दिएपछि आफूहरू सर्वोच्च गएको भन्दै देउवाले भने, ‘हामीले सर्वोच्चमा दियौं । सर्वोच्चले चुनाव भइसक्यो, के गर्ने ? पहिले भएको भए हुन्थ्यो भन्यो । अति भयो नि भनेपछि पुनरावलोकनमा गयौं । पुनरावलोकनले निस्सा दियो हामीलाई । निस्सा दिएपछि हाम्रो आधाभन्दा बढी विजय भइसक्यो ।’
विशेष अधिवेशन बोलाएपछि आफूहरूले मुद्दा हाले पनि निर्वाचन आयोगका पदाधिकारीले ‘ज्यानको खतरा’ देखाउँदै पार्टी अद्यावधिक गरिएको पनि देउवाले दाबी गरे ।
‘हामीले मुद्दा हाल्यौं निर्वाचन आयोगमा । निर्वाचन आयोगको अध्यक्ष (प्रमुख) ले ज्यानको खतरा भएकाले भनेको छ । बोलेको छ है हेर्नुस् त्यहाँ,’ उनले भने, ‘ज्यानको खतरा भएर गर्नुपर्यो भनेको उसले बोलेको छ । मैले भनेको होइन, सबैले सुनेको कुरो हो यो । ज्यानको खतरा, त्यत्रो त्रास । सिधा डरायो, त्यो निर्वाचन आयोगको प्रमुख ।’
देउवाले आफूहरूलाई पार्टीको आधिकारिकताबाट बञ्चित गर्ने प्रयास भइरहेको पनि आरोप लगाए । ‘अब अहिले पनि के गरेर हुन्छ, कसलाई भनेर हुन्छ, कुनै पनि हालतमा पुनरावलोकनबाट नेपाली कांग्रेसको आधिकारिकता हामीले पाउनुपर्ने कुरा रोक्ने कोसिस भइरहेको छ,’ देउवाले भने, ‘तर, हामी कुनै हालतमा मान्दैनौं ।’
पूर्वप्रधानमन्त्रीसमेत रहेका देउवाले सर्वोच्चबाट आफूहरूलाई न्याय हुनेमा विश्वस्त रहेको पनि विचार गोष्ठीमा सुनाए ।
‘यिनीहरूले जतिसुकै धाएता पनि सर्वोच्च अदालतको मलाई विश्वास छ– जसरी निष्पक्ष रुपमा हामीलाई निस्सा दिएको छ त्यस्तै रुख चिन्ह, चारतारे झण्डा नेपाली कांग्रेसको हामीले पाउने छौं भन्ने विश्वास लिएको छु,’ उनले भने, ‘मलाई विश्वास छ, जति सुकै जे गरे पनि सर्वोच्चले न्याय दिने छ भन्ने विश्वास छ ।’
विचार गोष्ठीमा विशेष महाधिवेशनबारे देउवाले के भने ?
विशेष अधिवेशनको कुरा गर्नु जरुरी देखेको छ मैले । विधानमा विशेष अधिवेशन बोलाउने प्रावधान छ । विशेष अधिवेशन पार्टीले बोलाउने हो । सुवर्ण शमशेर पार्टी सभापति हुँदाखेरि विशेष अधिवेशन बोहालाइएको हो पहिले । ्
बीपी कोइराला पनि हुनुहुन्थ्यो । सबै एकता भएर, एक भएर बोलाइएको हो । त्यसमा पूरा सनाखत गराएर, को हो–को होइन भनेर प्रतिनिधि बोलाइएको थियो ।
पछि गगन थापाजीले विशेष अधिवेशन बोलाउनुपर्यो भन्नुभयो । मैले विशेष अधिवेशन बोलाउन पाउँछ, अधिकार छ पार्टीमा, त्यसका लागि को–को भाग लिने हो उसको सनाखत हुनुपर्यो । कुन जिल्लाको, कुन क्षेत्रको, कुन गाउँपालिकाको हो, त्यसको नाम सब चाहियो, सनाखत हुनपर्यो, बिना सनाखत गर्न पाइन्छ ? पहिले पनि बोलाइएको थियो । पार्टी सभापति सुवर्ण शमशेर हुँदा बोलाइएको हो । अहिले पार्टी सभापति म छु, मलाई थाहै छैन । तिमी बोलाउन पाउँछौं ? मलाई थाहै छैन बोलाइ दिने भन्दा हुन्छ दाइ, विचार गर्छु दाइ भनेर अचानक बोलाइदिए ।
पहिले सनाखत गराउन सनाखत । त्यो हो कि होइन ? त्यो मेम्बर छ कि छैन पार्टीको ? खल्तीबाट नाम राखेर धमाधम राखिदियो । त्यो विशेष अधिवेशन बालाए उनले ।
बोलाएपछि हामीले मुद्दा हाल्यौं निर्वाचन आयोगमा । निर्वाचन आयोगको अध्यक्ष (प्रमुख) ले ज्यानको खतरा भएकाले भनेको छ । बोलेको छ है हेर्नुस् त्यहाँ । ज्यानको खतरा भएर गर्नुपर्यो भनेको उसले बोलेको छ । मैले भनेको होइन, सबैले सुनेको कुरो हो यो । भन्दाखेरि ज्यानको खतरा, त्यत्रो त्रास । सिधा डरायो त्यो निर्वाचन आयोगको प्रमुख ।
त्यसपछि हामीले सर्वोच्चमा दियौं । सर्वोच्चले चुनाव भइसक्यो, के गर्ने ? पहिले भएको भए हुन्थ्यो भन्यो । अति भयो नि भनेपछि पुनरावलोकनमा गयौं । पुनरावलोकनले निस्सा दियो हामीलाई । निस्सा दिएपछि हाम्रो आधाभन्दा बढी विजय भइसक्यो ।
अब अहिले पनि के गरेर हुन्छ, कसलाई भनेर हुन्छ यसलाई कुनै पनि हालतमा पुनरावलोकनबाट नेपाली कांग्रेसको आधिकारिकता हामीले पाउनुपर्ने कुरा रोक्ने कोसिस भइरहेको छ । तर, हामी कुनै हालतमा मान्दैनौं ।
मलाई विशवास छ अदालतले पञ्चायतकालदेखि नै हामीलाई जेलबाट छुटाएको हो । त्यस्तै राजा ज्ञानेन्द्रले जेल हाल्दाखेरि पनि अदालतबाट मैले आशा मारिसकेको थिएँ । मैले मेरो श्रीमतीलाई बोलाएर भनेँ– हेर, सर्वोच्च पनि राजासँग डराउँछ होला । छोरालाई पढाउनू । मलाई १०–१२ वर्ष हाले हाल्छ भनेँ ।
तर, सर्वोच्च अदालतले राजा ज्ञानेन्द्रको खिलापमा उसैबेला मलाई बचाएको हो । तयसकारण सर्वोच्च अदालतप्रति मलाई विश्वास छ । सर्वोच्च अदालतले मलाई न्याय दिन्छ भन्ने विश्वास छ ।
सर्वोच्च अदालतमा यिनीहरूले जतिसुकै धाएता पनि सर्वोच्च अदालतको मलाई विश्वास छ– जसरी निष्पक्ष रुपमा हामीलाई निस्सा दिएको छ त्यस्तै रुख चिन्ह, चारतारे झण्डा नेपाली कांग्रेसको हामीले पाउने छौं भन्ने विश्वास लिएको छु । मलाई विश्वास छ, जति सुकै जे गरे पनि सर्वोच्चले न्याय दिने छ भन्ने विश्वास छ ।