दसैँमा नयाँ पैसा लिन सजिलो, एटिएमबाटै १०० रुपियाँका नोट
काठमाडौँ, असोज २१ गते । नेपाल राष्ट्र बैङ्कले दसैँलगायत चाडपर्वलाई लक्षित गर्दै बैङ्क तथा वित्तीय संस्थालाई एटिएमबाटै १०० रुपियाँका नयाँ नोट उपलब्ध गराउन निर्देशन दिएको छ ।
राष्ट्र बैङ्कको निर्देशनसँगै केही बैङ्क तथा वित्तीय संस्थाले नयाँ प्रविधियुक्त एटिएमबाट १०० रुपियाँका नोट वितरण गर्न थालेका छन् ।
नेपाल राष्ट्र बैङ्कका प्रवक्ता गुरुप्रसाद पौडेलले भोटेकोशी बाढीबाट ठूलो जनधनको क्षति भएको अवस्थामा नयाँ नोटबारे अनावश्यक प्रचारप्रसार नगरी चाडपर्वलाई लक्षित गरेर राष्ट्र बैङ्क र वाणिज्य बैङ्कबाट सुकिला तथा सफा नोट प्राप्त गर्न सकिने व्यवस्था मिलाइएको जानकारी दिनुभयो ।
“एकातर्फ पैसा सटही गर्ने काम दैनिक गर्नुपर्ने नियमित काम जस्तै हो । यसलाई सूचना नै निकालेर गरिरहनुपर्छ भन्ने छैन,” उहाँले भन्नुभयो, “चाडपर्वकै मुखमा भोटेकोशी बाढीले ठूलो जनधनको क्षति भएकाले पनि राष्ट्र बैङ्कले दसैँ मनाउन भनी सूचना जारी गर्न उपयुक्त देखिएन । हामीले यो ढङ्गले गर्न लागेका हौँ ।”
प्रवक्ता पौडेलका अनुसार असोज १ गतेदेखि राष्ट्र बैङ्कको थापाथलीस्थित कार्यालय, प्रादेशिक कार्यालय तथा वाणिज्य बैङ्कबाट सुकिला र सफा नोट वितरण भइरहेको छ ।
उहाँले विगत चार–पाँच वर्षदेखि चाडपर्व लक्षित गरेर नयाँ नोट बजारमा ल्याउने परिपाटीलाई क्रमशः न्यूनीकरण गर्ने प्रयास भइरहेको बताउनुभयो ।
“गत भदौ ३१ गतेसम्म सात खर्ब ९४ अर्ब रुपियाँ करेन्सी इन सर्कुलेसन भएको छ । सो रकमको करिब आठदेखि १० प्रतिशतसम्म दसैँमा वृद्धि हुने अनुमान गरेका छौँ,” उहाँले भन्नुभयो । रासस