कर दिवसमा विभागको १५ बुँदे सङ्कल्प : ६० प्रतिशत बेरुजु यही वर्ष फर्छ्यौट

काठमाडौँ, मंसिर १ गते । राष्ट्रिय कर दिवस, २०८३ को उपलक्ष्यमा आन्तरिक राजस्व विभागले कर प्रणालीको रूपान्तरण, प्रविधिमा नवप्रवर्तन र सेवामा सुशासन कायम गर्ने लक्ष्यसहित १५ बुँदे सङ्कल्प सार्वजनिक गरेको छ ।

विभागका महानिर्देशकद्वारा जारी प्रतिविद्धतामा वि.सं. २०८४ आषाढ मसान्तभित्र कुल राजस्व बेरुजु अङ्कको कम्तीमा ६० प्रतिशत फर्छ्यौट गरी सम्परीक्षण गरिने उल्लेख छ । साथै, राजस्व सङ्कलनमा दिगो वृद्धि हासिल गर्दै विभागलाई तोकिएको ७ खर्ब ७५ अर्ब रुपैयाँको राजस्व लक्ष्य पूरा गरिने सङ्कल्प गरिएको छ ।

प्रविधि, एआई र स्वचालित कर प्रणाली

विभागले कर प्रशासनलाई प्रविधिमैत्री र स्वचालित बनाउने कार्यलाई उच्च प्राथमिकतामा राखेको छ ।

प्रतिबद्धताअनुसार करदातासम्बन्धी सम्पूर्ण सूचना, कारोबार र कर अनुपालनको विवरण सुरक्षित एवं एकीकृत रूपमा व्यवस्थापन गर्न ‘एक करदाता एक डिजिटल पहिचान’ को विकास गरिनेछ ।

यस्तै, करदाताहरूको जिज्ञासा तथा गुनासो सम्बोधन गर्न २४ सै घण्टा सञ्चालनमा आउने गरी ‘एआईमा आधारित कल सेन्टर र च्याटबोट’ स्थापना गरिने विभागले जनाएको छ ।

कर प्रशासनमा सबै करदाताको डिजिटल पहुँच सुनिश्चित गर्न आगामी २०८३ माघ महिनादेखि विद्यमान कर प्रणालीलाई स्वचालनमा लैजाने गरी ‘बिजनेस प्रोसेस रि-इन्जिनियरिङ’ को विस्तृत परियोजना प्रतिवेदनअनुसार कार्य प्रारम्भ गरिने प्रतिविद्धतामा उल्लेख छ ।

नक्कली बीजक नियन्त्रण र डिजिटल ट्र्याकिङ

कारोबारको तथ्याङ्क र कर विवरणबीचको अन्तर पहिचान गरी नक्कली बीजक तथा कारोबार लुकाउने प्रवृत्ति नियन्त्रण गर्न विभागले नेपाल राष्ट्र बैङ्कको समन्वयमा नयाँ प्रणाली विकास गर्ने भएको छ । जसअनुसार खुद्रा बिक्रेतासँगको कारोबारमा डिजिटल भुक्तानी वा क्यूआर पेमेन्ट गर्दा स्वतः बीजक सिर्जना हुने व्यवस्था मिलाइनेछ ।

यसैगरी, विद्यमान वित्तीय प्रतिवेदन ढाँचालाई मेसिनले पढ्न सक्ने ढाँचामा रूपान्तरण गरिने र अन्तःशुल्कजन्य वस्तुको उत्पादन, भण्डारण तथा वितरणका चरणको ट्र्याकिङ र ट्रेसिङ गर्न ‘डिजिटल स्टिकर’ कार्यान्वयन प्रारम्भ गरिने विभागले जनाएको छ ।

खर्चको विवरण ट्र्याक गर्न भन्सार विभाग, बैंक तथा वित्तीय संस्था, कम्पनी रजिष्ट्रार, भूमि प्रशासन, नेपाल स्टक एक्सचेन्ज, यातायात व्यवस्था कार्यालय र स्थानीय तहलगायतका निकायसँग कानुनबमोजिम सूचना आदानप्रदानका लागि अन्तर-आबद्धता कायम गरिनेछ ।

ग्रे लिष्टबाट बाहिरिने र कर न्यायमा जोड

नेपाललाई सम्पत्ति शुद्धीकरणका सन्दर्भमा ‘ग्रे लिष्ट’ बाट बाहिर ल्याउन जोखिममा आधारित सुपरिवेक्षण र अनुसन्धानलाई प्रभावकारी बनाइने विभागले जनाएको छ ।

स्वयं कर घोषणाअनुसार पेस भएका विवरणहरूको जोखिम विश्लेषण गरी कर परीक्षण, अनुसन्धान र अनुगमनमा स्पष्ट नतिजा हासिल गरिने जनाइएको छ ।

कर विवादको शीघ्र समाधान र कर न्याय कायम गर्न विगतका सबै निवेदनहरूको फर्छ्यौट गरिने र प्रशासकीय पुनरावलोकनका लागि दर्ता हुने निवेदनमा कानुनले तोकेको समयभित्रै निर्णय गरिने विभागको प्रतिबद्धता छ । साथै, आय, खर्च र कर दाखिलाको विवरण स्पष्ट हुने गरी विद्यमान कर चुक्ताको ढाँचामा संशोधन र एकरूपता कायम गरिने उल्लेख छ ।

करदाता शिक्षा, सुशासन र अन्तर्राष्ट्रिय सहकार्य


विभागले स्थानीय तह र निजी क्षेत्रसँगको समन्वयमा देशभर करदाता शिक्षा सञ्चालन गर्दै “स्वैच्छिक कर सहभागिता राष्ट्रिय अभियान” सुरु गर्ने घोषणा गरेको छ ।

कर प्रशासनमा कार्यरत जनशक्तिको क्षमता, सदाचारिता र डिजिटल सीप विकास गरी कार्यसम्पादनमा आधारित मूल्याङ्कन प्रणाली लागू गरिने र ‘संस्थागत सदाचारिता सूचकाङ्क’का आधारमा सुशासनको स्तर निर्धारण गरिनेछ ।

त्यसैगरी, कर सार्वभौमसत्ताको संरक्षण र सहकार्य प्रवर्द्धन गर्दै नेपालको कर प्रणालीलाई अन्तर्राष्ट्रिय मापदण्डबमोजिम आधुनिक, पूर्वानुमानयोग्य, पारदर्शी र लगानीमैत्री बनाइने तथा दोहोरो करमुक्ति सम्झौतालाई उच्च प्राथमिकताका साथ अघि बढाइने विभागको सङ्कल्पमा उल्लेख छ ।

Related News

Leave a Reply

टाइप गरेर स्पेस थिच्नुहोस् र नेपाली युनिकोडमा पाउनुहोस। (Press Ctrl+g to toggle between English and Nepali OR just Click on the letter). अंग्रेजीमा टाइप गर्न "अ" मा थिच्नुहोस्।

TOP NEWSview all

31 Nepali scientists included in the global ranking of best scientists

Nepal and Germany sign two agreements

Auspicious Timings for Dashain Tika Announced for Various Countries

Nepal Premier League to be held from November 17

Apple farming flourishes in Upper Mustang




Positive Development Media Pvt. Ltd. / Regd. No: 232 / 073-74

Newbaneshwor
Kathmandu, Nepal

4479401


Editor : Mr. Divesh J.B. Rana

Chairperson : Mr. Kishore Thapa


Counter:
Web Counter