पूर्वराजा शाहलाई सात लाख ९३ हजार जरिबाना; राप्रपा हिंसात्मक गतिविधिको विपक्षमा छ : अध्यक्ष लिङ्देन; तीनकुने घटनामा संलग्न १११ जना पक्राउ
काठमाडौँ, चैत १६ गते । काठमाडौँ महानगरपालिकाले पूर्वराजा ज्ञानेन्द्र शाहलाई सात लाख ९३ हजार जरिबाना तोकेको छ ।
काठमाडौँ–३२ तीनकुनेमा शुक्रबार पूर्व राजाको पक्षमा भएको प्रदर्शनका क्रममा सार्वजनिक स्थानमा फोहोर मैला गरेको, सार्वजनिक सम्पत्ति तोडफोड गरी क्षति गरेको, भौतिक संरचना भत्काएको, निजी सम्पत्तिमा हानी गरेको सहितका शीर्षकमा महानगरले पूर्वराजा शाहको नाममा शनिबार जरिबाना पत्र काटिएको हो ।
महानगरद्वारा शनिबार जारी जरिबानासम्बन्धी विभिन्न पत्रमा सो जरिवाना रकम तोकेको हो । हिजो (शुक्रबार) तीनकुनेमा भएको प्रदर्शनलाई लिएर महानगरले छुट्टाछुट्टै जरिबाना तिराउने निर्णय गरेको छ ।
राप्रपा हिंसात्मक गतिविधिको विपक्षमा छ : अध्यक्ष लिङ्देन
राष्ट्रिय प्रजातन्त्र पार्टीका अध्यक्ष राजेन्द्र लिङ्देनले राप्रपा हिंसात्मक गतिविधिको विपक्षमा रहेको बताउनुभएको छ।
शनिबार पार्टी केन्द्रीय कार्यालय धुम्बाराहीमा बसेको पार्टीको केन्द्रीय कार्यसम्पादन समितिको बैठकपछि सञ्चारकर्मीसँग कुरा गर्दै उहाँले यस्तो बताउनुभएको हो।
उहाँले शान्तिपूर्ण ढंगले सभा भइरहेको मञ्चमा सुनियोजित रुपमा अश्रु ग्यास प्रहार भएको आरोप लगाउँदै यस्तो बताउनुभएको हो। उहाँले तीनकुने घटनाको छानबिन गर्न सरकारले निष्पक्ष छानविनका न्यायिक आयोग गठन गर्नुपर्ने बताउनुभयो।
उहाँले प्रदर्शनमा सहभागी पार्टीका नेता रविन्द्र मिश्र, धवल समशेर जबरा र अधिवक्ता स्वागत नेपाल लगायतलाई २४ घण्टाभित्र बिना शर्त रिहा गर्न माग गर्नुभयो। बिना शर्त रिहाइ नगरे राप्रपाले विरोधका कार्यक्रम गर्ने निर्णय गरेको उहाँको भनाइ छ।
राप्रपाले आन्दोलनका क्रममा निधन भएका सुरेश रजक र सविन महर्जनलाई सहिद घोषणा गर्न र उचित क्षतिपूर्ति दिन माग गर्ने निर्णय गरेकोसमेत उहाँले जानकारी गराउनुभएको छ।
तीनकुने हिंसात्मक प्रदर्शनमा संलग्न १११ जना पक्राउ
काठमाडौँको तीनकुनेमा शुक्रबार पूर्वराजाको समर्थनले गरेको हिंसात्मक प्रदर्शनमा संलग्न भएको आरोपमा प्रहरीले हालसम्म १११ जनालाई पक्राउ गरेको छ ।
पूर्व राजाको समर्थनमा भएको प्रदर्शनका क्रममा आक्रमण, तोडफोड, आगजनी र लुटपाटमा संलग्न रहेका र घटना घटाउन उक्साउनेसहित १११ जनालाई पक्राउ गरिएको जिल्ला प्रहरी परिसर काठमाडौँका प्रवक्ता एवं प्रहरी उपरीक्षक अपीलराज बोहराले जानकारी दिनुभयो।
उहाँका अनुसार शुक्रबार एक सय पाँच जनालाई पक्राउ गरिएको थियो भने आज थप छ जना पक्राउ परेका हुन्।प्रहरी परिसर काठमाडौँले २५, प्रहरी वृत्त बानेश्वरले २५, प्रहरी वृत्त गौशालाले नौ, प्रहरी प्रभाग कोटेश्वरले ४६, प्रभाग गोङ्गबुले तीन, प्रहरी वृत्त बालाजुले एक, प्रहरी वृत्त सिंहदरबारले दुई जनालाई पक्राउ गरेको उहाँले जानकारी दिनुभयो ।
उक्त घटनामा दुई जनाको मृत्यु भएको जनाउँदै प्रहरी प्रवक्ता बोहराले नेपाल प्रहरीतर्फ ५५, सशस्त्र प्रहरीतर्फ २२ र प्रर्दशनकारीतर्फ ५१ जना घाइते भएका उल्लेख गर्नुभयो।तीमध्ये प्रहरी र प्रदर्शनकारीसहित २१ जनाको विभिन्न अस्पतालमा उपचार जारी रहेको काठमाडौँ प्रहरीले जनाएको छ ।
तोडफोड, आगजनी र लुटपाट
प्रवक्ता बोहराका अनुसार व्यक्तिगत र सरकारी कार्यालय गरी १८ वटामा तोडफोड भएको छ।विभिन्न १२ ठाउँमा आगजनी तथा एक ठाउँमा तोडफोड तथा लुटपाट भएको छ।
“प्रहरीतर्फ छ, सरकारी कार्यालयको चार, विवरण नखुलेको छ गाडी तथा विवरण नखुलेको स्कुटर र मोटरसाइकलसहित छ वटामा तोडफोड भएको छ।केही गाडी जलाइएको छ”, उहाँले भननुभयो।