राति पाँच प्रदेशमा धेरै भारी वर्षाको सम्भावना; कृष्णभिर क्षेत्रमा आज रातिदेखि सवारी सञ्चालनमा रोक; सुरक्षा संयन्त्र उच्च सतर्क अवस्थामा
काठमाडौँ, असोज ७ गते । नेपाल मौसम विज्ञान विभाग अन्तर्गतको मौसम पूर्वानुमान महाशाखाले बिहीबार राति पाँच प्रदेशमा भारी वर्षाको सम्भावना रहेको बताएको छ ।
महाशाखाका अनुसार बिहीबार राति कोशी, बागमती, गण्डकी र लुम्बिनी प्रदेशको थोरै स्थानमा साथै मधेस प्रदेशको एक, दुई स्थानमा भारीदेखि धेरै भारी वर्षाको सम्भावना छ । मधेस प्रदेश तथा कोशी, बागमती, गण्डकी र लुम्बिनी प्रदेशको तराई भूभागका केही स्थानमा हावाहुरीको समेत सम्भावना छ ।
हाल देशभर कोशी, मधेस, बागमती, गण्डकी, लुम्बिनी र कर्णाली प्रदेशमा अधिकांश बादल लागेको छ भने सुदूरपश्चिम प्रदेशमा आंशिक बादल लागेको छ । यी प्रदेशका धेरै स्थानमा तथा कर्णाली र सुदूरपश्चिम प्रदेशको एक, दुई स्थानमा हल्का वर्षा भइरहेको छ ।
शुक्रबार कोशी, बागमती, गण्डकी, लुम्बिनी र कर्णाली प्रदेशको थोरै स्थानमा भारीदेखि धेरै भारी वर्षाको सम्भावना छ । लुम्बिनी र गण्डकी प्रदेशको एक, दुई स्थानमा अति भारी वर्षाको सम्भावना छ । मधेस प्रदेशको एक, दुई स्थानमा भारी वर्षाको सम्भावना छ भने मधेस तथा कोशी, बागमती, गण्डकी र लुम्बिनी प्रदेशको तराई भूभागका केही स्थानमा हावाहुरीको समेत सम्भावना छ ।
शनिबार गण्डकी, लुम्बिनी, कर्णाली र सुदूरपश्चिम प्रदेशको थोरै स्थानमा भारीदेखि धेरै भारी वर्षाको सम्भावना छ । मधेस प्रदेश तथा कोशी, बागमती, गण्डकी र लुम्बिनी प्रदेशको तराई भूभागका केही स्थानमा हावाहुरीको समेत सम्भावना छ ।
कृष्णभिर क्षेत्रमा आज रातिदेखि सवारी सञ्चालनमा रोक
अविरल वर्षाका कारण बिहान केही स्थानमा पहिरो खसेर एकतर्फी सञ्चालन भएको धादिङको कृष्णभिर सडकखण्ड अहिले दुईतर्फी रूपमा सञ्चालनमा आएको छ । बिहान खसेको पहिरो हटाएपछि सवारी आवत-जावत सामान्य बने पनि थप वर्षाका कारण सम्भावित जोखिमलाई मध्यनजर गर्दै आज बेलुका ८: ०० बजेदेखि भोलि बिहान ५: ०० बजेसम्म सो सडक खण्डमा सवारी सञ्चालन बन्द गरिने जिल्ला प्रशासन कार्यालय धादिङले जनाएको छ ।
धादिङका प्रमुख जिल्ला अधिकारी लक्ष्मी पाण्डेय गौतमका अनुसार अहिले कृष्णभिरमा दुवैतर्फ सवारीसाधन सञ्चालन भइरहेको छ । सडकको अवस्था निगरानी गर्न तथा वर्षाका कारण आउन सक्ने सम्भावित अवरोध तत्काल व्यवस्थापन गर्न प्राविधिक टोली, होल्डिङ सेन्टर, जेसीबीलगायतका उपकरण तथा प्रहरी टोली तयारी अवस्थामा राखिएको उहाँले जानकारी दिनुभयो ।
प्रमुख जिल्ला अधिकारी गौतमका अनुसार भारी वर्षाका कारण सडकमा पुनः पहिरो खस्न सक्ने तथा सडकको अवस्था जोखिमपूर्ण हुन सक्ने भएकाले रातिको समयमा सवारी सञ्चालन रोक्ने निर्णय गरिएको हो । बिहीबार बेलुका ८ बजेदेखि शुक्रबार बिहान ५ बजेसम्म सडक बन्द गरेर सो अवधिमा सडकको अवस्था निरीक्षण तथा आवश्यक व्यवस्थापनको काम गरिने जनाइएको छ ।
इलाका प्रहरी कार्यालय गजुरीका प्रमुख प्रहरी नायब उपरीक्षक (डिएसपी) सुरज कार्कीका अनुसार बिहान कृष्णभिरलगायत केही स्थानमा पहिरो खसेपछि पृथ्वी राजमार्ग केही समय एकतर्फी भएको थियो । पहिरो पन्छाएपछि बिहानैदेखि सडक दुईतर्फी रूपमा सञ्चालनमा आएको छ ।
डिएसपी कार्कीका अनुसार अहिले कृष्णभिरमा सवारीसाधनको आवत-जावत भइरहेको छ । यद्यपि, वर्षा निरन्तर भइरहेकाले राजमार्गको विभिन्न स्थानमा पहिरो तथा लेदो खस्न सक्ने सम्भावना रहेकाले सुरक्षा निकायले सडकको अवस्था निरन्तर निगरानी गरिरहेको जनाएको छ ।
यसअघि भोटेकोशी र त्रिशूली नदीमा आएको बाढी तथा पहिरोका कारण कृष्णभिरमा सडकको केही भाग क्षतिग्रस्त भएपछि पृथ्वी राजमार्गको उक्त खण्ड लामो समय अवरुद्ध भएको थियो । सडक भासिएपछि नयाँ ट्रयाक निर्माण गरी असोज १ गतेदेखि सवारी साधन दुईतर्फी सञ्चालनमा आएको थियो ।
डिएसपी कार्कीले यात्राको क्रममा सडकको अवस्थालाई ध्यानमा राखी सुरक्षित यात्रा गर्न आग्रह गर्नुभएको छ । उहाँका अनुसार आवश्यक सहयोग, समन्वय तथा सहजीकरणका लागि जिल्ला आपतकालीन कार्यसञ्चालन केन्द्र (डीईओसी) को १२३४ वा ०१०–५२१४६४, नेपाल प्रहरीको १०० तथा सशस्त्र प्रहरी बलको १११४ मा सम्पर्क गर्न सकिनेछ ।
भारी वर्षाका कारण पृथ्वी राजमार्गका अन्य स्थानमा समेत पहिरो तथा सडक अवरोधको जोखिम रहेकाले सवारी चालकलाई सडकको तत्कालीन अवस्था बुझेर मात्र यात्रा गर्न जिल्ला प्रशासन कार्यालयले अनुरोध गरेको छ । विशेषगरी रातिको समयमा सडकको दृश्यता कम हुने तथा वर्षाका कारण पहिरोको जोखिम बढ्न सक्ने भएकाले आज राति ८ बजेदेखि भोलि बिहान ५ बजेसम्म सवारी आवत–जावत रोक्ने निर्णय गरिएको प्रमुख जिल्ला अधिकारी गौतमले बताउनुभयो ।
निरन्तरको वर्षासँगै सुरक्षा संयन्त्र उच्च सतर्क अवस्थामा
मौसम पूर्वानुमान महाशाखाले बिहीबारदेखि चार दिनसम्म निरन्तर वर्षा हुने पूर्वानुमान गरेसँगै बाढी, पहिरो र डुबानलगायतका सम्भावित विपद्को प्रतिकार्यका लागि देशभरको सुरक्षा संयन्त्रलाई उच्च सतर्क अवस्थामा राखिएको छ ।
सम्भावित विपद् भएलगत्तै खोज तथा उद्धार, राहत तथा घाइतेको उपचारमा परिचालन गर्न नेपाली सेनाले हवाई साधनसहित विशेष टोलीलाई चार स्थानमा तयारी अवस्थामा राखेको छ भने नेपाल प्रहरी र सशस्त्र प्रहरी बलले जोखिमयुक्त क्षेत्रमा ठूलो सङ्ख्यामा जनशक्ति र उद्धार सामग्री परिचालन गरेका छन् ।
सुरक्षा निकायले देशभर ६४९ स्थानलाई सम्भावित जोखिमयुक्त क्षेत्रका रूपमा पहिचान गरी पूर्वसचेतना, निगरानी र प्रतिकार्यको तयारी अघि बढाएका छन् । बढी वर्षा हुने आकलन गरिएको गण्डकी र लुम्बिनी प्रदेशमा सुरक्षा संयन्त्रलाई थप सक्रिय बनाइएको छ । नदी तटीय क्षेत्र, पहिरोको जोखिम रहेका बस्ती तथा विगतमा डुबान प्रभावित क्षेत्रलाई विशेष निगरानीमा राखिएको छ ।
नेपाली सेनाका प्रवक्ता सहायकरथी राजाराम बस्नेतले काठमाडौँ, सुर्खेत, धनगढी र रुपन्देहीलाई केन्द्र बनाएर हवाई साधनसहितका विशेष उद्धार तथा विपद् प्रतिकार्य टोली तयारी अवस्थामा राखिएको जानकारी दिनुभयो ।
काठमाडौँमा चारवटा हेलिकोप्टरसहितको उद्धार टोलीलाई तत्काल परिचालन गर्न सकिने गरी तयारी अवस्थामा राखिएको छ । सुर्खेतमा एक हेलिकोप्टर र एक स्काई ट्रक, धनगढीमा अगुष्टा हेलिकोप्टरसहितको आपत्कालीन उद्धार टोली तथा रुपन्देहीको बुटवलमा आवश्यक साधनसहितको विपद् प्रतिकार्य टोली तयारी अवस्थामा राखिएको सेनाले जनाएको छ ।
“सम्भावित चक्रवात र त्यसबाट उत्पन्न हुनसक्ने विपद्लाई मध्यनजर गरी चार स्थानमा हवाई साधनसहितको टोली तयारी अवस्थामा राखेका छौँ,” प्रवक्ता बस्नेतले भन्नुभयो, “सबै पृतना र गणलाई पनि उच्च सतर्क अवस्थामा राखिएको छ ।”
सेनाले देशभरका आठवटा पृतना मुख्यालय तथा जिल्लास्थित सबै गुल्म र गणलाई आवश्यक जनशक्ति, उपकरण र साधनसहित तत्काल प्रतिकार्यमा खटिन सक्ने अवस्थामा राखेको छ । सम्भावित विपद्मा घाइते तथा बिरामीको चाप बढ्नसक्ने अवस्थालाई ध्यानमा राख्दै काठमाडौँस्थित वीरेन्द्र सैनिक अस्पताल, छाउनी तथा सातै प्रदेशमा रहेका सैनिक फिल्ड अस्पतालमा आकस्मिक स्वास्थ्य टोली र आवश्यक स्वास्थ्य सेवा तयारी अवस्थामा राखिएको छ ।
यसैगरी सशस्त्र प्रहरी बलले जोखिमयुक्त क्षेत्रमा ११ हजार ७६३ फौज परिचालन गरेको छ । उद्धारका लागि ८२ वटा -याफ्ट बोट र ५३ वटा मोटर बोट तयारी अवस्थामा राखिएको सशस्त्र प्रहरीका प्रवक्ता, सशस्त्र प्रहरी नायम महानिरीक्षक (डिआईजी) नेत्रबहादुर कार्कीले जानकारी दिनुभयो । तालिमप्राप्त गोताखोर, मेडिकल टोली र ड्रोन टोलीसमेत जोखिमयुक्त क्षेत्रमा परिचालन गरिएको छ ।
सशस्त्र प्रहरीले नदी तटीय क्षेत्रमा पूर्वसूचना प्रवाह गर्नुका साथै स्थानीयलाई सम्भावित जोखिमबारे सचेत गराइरहेको छ । नदी किनारमा दाउरा सङ्कलनलगायतका काममा पुग्ने स्थानीयलाई समेत जोखिमबारे जानकारी गराउने कार्य भइरहेको छ ।
नेपाल प्रहरीले पनि विपद् प्रतिकार्य तथा तालिम केन्द्रबाट विपद् व्यवस्थापनसम्बन्धी तालिम प्राप्त सुरक्षाकर्मीलाई थप मद्दतका रूपमा जोखिमयुक्त क्षेत्रमा परिचालन गरेको छ । प्रहरी प्रवक्ता, प्रहरी नायव महानिरीक्षक (डिआईजी) अविनारायण काफ्लेले बागमती प्रदेशका रोशी, सुनकोशी, त्रिशूली र इन्द्रावती तथा मधेस प्रदेशका कमला, चारनाथ, बलान र बिहुल खोलाका तटीय क्षेत्रमा माइकिङ तथा पूर्वसचेतना अभियान सञ्चालन गरिएको जानकारी दिनुभयो ।
उहाँका अनुसार मधेस प्रदेशमा ७४ र काठमाडौँ उपत्यकामा ५२ स्थानलाई जोखिमयुक्त क्षेत्रका रूपमा पहिचान गरी सोहीअनुसार पूर्वतयारी गरिएको छ ।
सुरक्षा निकायले मौसम सक्रिय रहने अवधिभर जोखिमयुक्त क्षेत्रमा निरन्तर निगरानी राख्ने जनाएको छ । स्थानीय तह तथा जिल्ला विपद् व्यवस्थापन समितिसँग समन्वय गरी आवश्यकताका आधारमा थप जनशक्ति, उद्धार सामग्री तथा हवाई साधन परिचालन गर्ने व्यवस्था मिलाइएको छ ।
सम्भावित विपद्को प्रारम्भिक सूचना प्राप्त हुनासाथ सम्बन्धित स्थानमा तत्काल प्रतिकार्य टोली पठाउने गरी सुरक्षा संयन्त्रलाई तयारी अवस्थामा राखिएको छ ।