सुकुम्बासी समस्याको हल गर्छौं : मन्त्री रावल
बिर्तामोड, कार्तिक १६ गते । सङ्घीय मामिला तथा सामान्य प्रशासन तथा भूमि व्यवस्था, सहकारी तथा गरिबी निवारण मन्त्री प्रतिभा रावलले सुकुम्वासी र लालपुर्जाको विषयलाई चुनावी एजेण्डा नबनाउनेगरी सरकारले काम थालेको बताउनुभएको छ ।
सोमबार झापाको कनकाई नगरपालिका – ७ स्थित सुकुम्बासी बस्तीको अवलोकनपछि आयोजित कार्यक्रममा बोल्नुहुँदै मन्त्री रावलले रास्वपा सरकारले त झन् यसलाई एजेण्डा कुनै हालतमा नबनाउने भन्दै अन्य दल समेतले सुकुम्बासी अव्यवस्थित बसोबासी र भुमिहिन दलितका कुनैपनि जमिनसम्बन्धी नारालाई चुनावी नारा बन्न नदिनेगरी सबै समस्या चाँडोभन्दा चाँडो हल गर्ने बताउनुभयो । नयाँ सरकार बन्दा पनि प्रधानमन्त्रीले धनीपुर्जाको समस्या समाधानका लागि एक हजार दिनको समयसीमा तोकेको भएपनि त्योभन्दा पहिलेनै समस्या समाधान गर्नेगरी सरकारले तयारी थालिसकेको उहाँको भनाइ छ ।
मन्त्री रावलले आवश्यक सबै कानुनहरु अध्यायदेशमार्फत ल्याइसकेको र आवश्यक परेमा पुनः कानुन परिमार्जन गर्नका लागिसमेत सरकार तयार रहेकोे बताउनुभयो । यसअगाडिका धेरै सरकारले आश्वासन मात्रै दिनेगरेको भन्ने जनतामा गुनासो रहेको भन्दै यो सरकारले काम गरेरै छाडने प्रष्ट पार्नुभयो । यसैबिच मन्त्री रावलले लामो समयदेखि अड्किएर बसेको रेलमार्गका जग्गाधनीहरुका लागि समेत सरकारले सकेसम्म चाँडै मुआब्जा वितरणको कामलाई समेत तीव्रता दिने बताउनुभयो ।
कार्यक्रममा बोल्नुहुदै झापाका प्रमुख जिल्ला अधिकारी श्रवणकुमार पोखरेलले धनीपुर्जा वितरणका कतिपय नीतिगत समस्याहरु सरकारले अध्यायदेशमार्फत खोलेका कारण अब काममा कुनै बाधा व्यवधान नरहेको बताउँनुभयो । सरकारले बनाएरको जिल्लास्तरीय धनीपुर्जा वितरण समितिको संयोजकसमेत रहनुभएका प्रमुख जिल्ला अधिकारी पोखरेलले धनीपुर्जा वितरणका लागि लागि अब जग्गा दर्ता प्रक्रिया तीव्र बनेर जाने बताउनुभयो । यता रेलवेका लागि सरकारले पुर्वपश्चिम सर्वे गरेर केही जग्गाहरु रोक्का राखेको तर मुआब्जा दिएर निर्माण प्रक्रिया सुरु नगरेका कारण समस्या रहेको र यस समस्यालाई केन्द्र सरकारमा पुनः पठाइएको उल्लेख गर्नुभयो ।
यता कनकाई नगरपालिकाका प्रमुख राजेन्द्रकुमार पोखरेलले सरकार चाँडो अध्यादेशमार्फत भूमि ऐन नल्याउँदा नगरपालिका क्षेत्रमा ७ हजारभन्दा बढी जग्गा धनीपुर्जाको निस्सा वितरण गरेर पनि धनीपुर्जा वितरण गर्न नसकेको बताउनुभयो । अहिलेको सरकारले ल्याएका अध्यादेशबाट अब भने जनतालाई धनीपुर्जा वितरणको काम गर्न सक्ने वातावरण बनेको नगरप्रमुख पोखरेलको भनाइ थियो ।
कार्यक्रममा कनकाई नगरपालिका ७ का वडाअध्यक्ष भीष्मभुषण सिटौला, ६ का वडाअध्यक्ष लक्ष्मीप्रसाद ओली लगायातले जग्गाधनीपुर्जाको समस्याका बारेमा जानकारी गराउनुभयो ।
मन्त्री रावलले सोमबार नै झापाका सबै स्थानीय तहका प्रमुख प्रशासकीय अधिकृत र कार्यालय प्रमुखहरुलाई भेटेर झापामा जग्गाधनीपुर्जा वितरणको विलम्ब हुनेबारेमा सचेत गराउनुभएको छ । ‘सरकारले जनतालाई धनीपुुर्जा वितरणका लागि कस्तो र कति छिटो कानुन बनाउनुपर्छ त्यो सबै गर्न तयार छ तर तपाईहरुपनि तयार रहनुपर्छ’ मन्त्री रावलले भन्नुभयो । झापामा हालसम्म धनीपुर्जा वितरणको कार्यप्रगतिबारेमा मन्त्री रावलको गुनासो रहेको थियो ।
कार्यक्रममा झापा क्षेत्र नं. ३ का सांसद प्रकाश पाठक, ४ का सम्भु ढकाल, सांसद रमेश प्रसाई लगायतको सहभागिता रहेको थियो ।