सामुदायिक रेडियो ‘सिंजा’ को परीक्षण प्रसारण सुरु
जुम्ला, १५ असोज । नेपाली भाषाको उद्गमस्थल जुम्लाको सिंजाबाट सामुदायिक रेडियो सिंजाले एफएम ९२.८ मेगार्हजबाट परीक्षण प्रसारण सुरु गरेको छ ।
सिंजा क्षेत्रको नराकोट गाविसको वडा नं. २ मा स्थापित यो रेडियोले बिहीबारदेखि परीक्षण प्रसारण सुरु गरेको हो । अहिलेसम्म रेडियो नेपाल बाहेक अन्य कुनै प्रकारको सञ्चार माध्यमको पहुँच नभएको यो क्षेत्रमा रेडियो सेवा सुरु भएपछि विकासको एक नयाँ आयाम थपिएको छ ।
ग्रामीण जनतालाई सूचनाको पहुँचमा ल्याउन रेडियोको स्थापना गरेर प्रसारण गर्न सुरु गरिएको रेडियोका बोर्ड सदस्य डिल्ली प्रसाद तिवारीले जानकारी दिनुभयो । तिवारीका अनुसार जुम्ला जिल्लामा यस अघि दुईवटा रेडियो स्थापना भएपनि ऐतिहासिक सभ्यता बोकेको सिंजामा सूचनाको पहुँच पुगेको थिएन । अहिले ११ वटा गाविसलाई केन्द्रित गरेर रेडियोको स्थापना गरिएको हो । यो रेडियोले बिहीबार दिउँसो १ बजेदेखि परीक्षण प्रसारण सुुरु गरेको हो ।
रेडियो स्थापनाका लागि सिंजा क्षेत्रका ११ गाविसबाट करिब रु ८ लाख ५० हजार, जिल्ला विकास समिति जुम्लाबाट रु १ लाख, वैकल्पिक उर्जा प्रवद्र्धन केन्द्रबाट रु ३ लाख र बाँकी ऋण सहयोग गरी जम्मा २४ लाख रुपैयाँको लागतमा रेडियो सञ्चालन गरिएको हो ।
परीक्षण प्रसारणको प्रारम्भमा जुम्ला सिंजा क्षेत्र सहितका १४, कालिकोट जिल्लाका ३ र मुगु खतेड भेकका ४ वटा गाविसबाट आवाज सुनिएको प्रतिक्रियाहरु प्राप्त भएको जनाइएको छ । दुईसय ५० वाट क्षमताको यो एफएमले ग्रामीण वस्तीका आवाजहरु राष्ट्रको सूचनाको मूल प्रवाहमा लैजाने र मुलुकभरका खबरहरुमा ग्रामीण जनताको पहुँच कायम गराउने लक्ष्य लिएको छ । यसका साथै रेडियोले ऐतिहासिक सिंजा क्षेत्रको भाषा, संस्कृति तथा सभ्यताको जगेर्ना र विकास तथा सुशासन प्रवद्र्धन ठूलो भुमिका खेल्ने अपेक्षा राखिएको छ ।
जुम्लामा सिंजा रेडियोसँगै अब ३ वटा रेडियोले सेवा दिने भएका छन् । यहाँ रेडियो कर्णाली एफएम १०५.२ मेगाहर्ज र रेडियो नारी आवाज १००.६ मेगाहर्ज सञ्चालनमा छन् । अहिले रेडियो सिंजाले बिहान र बेलुका गरी १० घण्टासम्म परीक्षण प्रसारण गर्ने बताइएको छ । गाउँमा रेडियो सिंजाबाट आवाजहरु घन्किन थालेपछि स्थानीय जनतामा रेडियो सुन्ने उत्सुक जागेको सिंजा बड्की गाविसका शिक्षक खम्बा शाहीले जानकारी दिनुभयो । रासस
