काठमाडौँ, २३ असोज । अन्तर्राष्ट्रिय युवा बौद्ध महासङ्घको १२औँ सम्मेलनमा नेपालले सहभागिता जनाउने भएको छ ।

यही असोज २८ देखि ३० गतेसम्म बेल्जियममा हुने सो सम्मेलनमा नेपालका तर्फबाट अन्तर्राष्ट्रिय युवा बौद्ध महासङ्घ नेपाल च्याप्टरका अध्यक्ष भिक्षु तपस्सी धम्मले प्रतिनिधित्व गर्नुहुने भएको छ ।

नेपाललगायत विभिन्न ४६ मुलुकका १५० प्रतिनिधिले भाग लिने सो बैठकमा बौद्ध दर्शन तथा साहित्यका बारेमा समीक्षा गरिनेछ । त्यस्तै, विश्वका सम्पूर्ण बौद्ध धर्मावलम्बीको एकताका लागि विभिन्न देशका विद्वान्बीच अनुभव आदान प्रदान गरिनेछ ।

विश्वमा बढ्दै गएको हत्या हिंसा तथा आतङ्कलाई न्यूनीकरण गर्न बौद्ध धर्म तथा दर्शनलाई कसरी मानव कल्याणमा उपयोग गर्ने भन्ने बारेमा बैठकमा छलफल गरिनेछ ।

सो सम्मेलनमा नेपालको प्रतिनिधित्व गर्दै सहभागी हुने अध्यक्ष भिक्षु धम्मले नेपालमा बौद्ध धर्मको अवस्था तथा यसले नेपाली समाजमा पु¥याएको योगदानका बारेमा सहभागी मुलुकका प्रतिनिधिलाई जानकारी दिनुहुनेछ ।

उक्त महासङ्घमा विश्वका ३५ हजार युवा भिक्षु सहभागी छन् भने महासङ्घले विश्वमा शान्ति तथा समृद्धि कायम गर्न विभिन्न समाजसेवाका गतिविधि सञ्चालन गर्दै आएको छ । रासस