काठमाडौँ, २३ मङ्सिर । चिकित्साशास्त्र अध्ययन संस्था त्रिविका वरिष्ठ चिकित्सक प्रा डा गोविन्द केसीलाई यस वर्षको राष्ट्रिय सदाचार सम्मान–२०७२ प्रदान गरिएको छ ।

ट्रान्सफरेन्सी इन्टरनेसनल नेपालले डा केसीले स्वास्थ्य र शिक्षाको क्षेत्रमा आफनो जीवनको प्रभाव नगरी उल्लेखनीय योगदान पु¥याएबापत उहाँलाई सम्मान गरिएको हो ।

भ्रष्टाचार विरुद्धको अन्तर्राष्ट्रिय दिवसका अवसरमा आज यहाँ आयोजित एक कार्यक्रमकाबीच संस्कृतिविद् सत्यमोहन जोशीले उक्त सम्मान डा केसीलाई प्रदान गर्नुभयो । सम्मानमा दोसल्ला र आकर्षक ताम्रपत्र रहेको छ ।

संस्थाले दिवसका अवसरमा प्रत्येक वर्ष समाजमा सदाचार निर्माण गर्न र भ्रष्टाचार नियन्त्रण गर्न योगदान गर्ने विशिष्ठ व्यक्तिलाई सम्मान गर्दै आएको छ । यसअघि यो सम्मान पूर्वप्रधानमन्त्री कृष्णप्रसाद भट्टराई र संस्कृतिविद् सत्यमोहन जोशीलाई प्रदान गरिएको थियो ।

सो अवसरमा संस्कृतिविद् जोशीले मुलुकलाई सञ्चालन गर्ने नेता र नेतृत्व तथा शासन प्रणाली राम्रो नभएकै कारण भ्रष्टाचार मौलाएको भन्दै तल्लो तहदेखि नै भ्रष्टाचार निर्मूल पार्न सरकारले सामाजिक सुरक्षा र सार्वजनिक सेवालाई प्रभावकारी बनाउनुपर्ने खाँचो औँल्याउनुभयो ।

सम्मानित डा केसीले आम नेपालीको गुणस्तरीय स्वास्थ्य र शिक्षामा समान पहुँच हुनुपर्नेमा जोड दिदै मुलुक सञ्चालन गर्ने नेता र शासकमा राम्रो नेतृत्व नभएकै कारण भ्रष्टाचार मौलाउँदै गएको टिप्पणी गर्नुभयो ।

जबसम्म स्वास्थ्य र शिक्षा क्षेत्र राजनीतिकरणबाट मुक्त हँुदैन तबसम्म भ्रष्टाचार निर्मूल नहुने उहाँको भनाइ थियो ।

त्रिभुवन विश्वविद्यालयका पूर्व उपकुलपति डा केदारभक्त माथेमाले अहिलेको अभावमा कालोबजारी र भ्रष्टाचार मौलाएको बताउँदै यसको अन्त्यका लागि सामाजिक सुरक्षा र सार्वजनिक सेवालाई प्रभावकारी बताइनुपर्नेमा जोड दिनुभयो ।

संस्थाका अध्यक्ष डा भरतबहादुर थापाले नेपालमा सबै वर्ग र क्षेत्रमा भ्रष्टाचार मौलाएको भन्दै यसको जरैबाट निर्मूल गर्नका लागि सामाजिक अगुवा एकजुट भएर लाग्नुपर्नेमा जोड दिनुभयो । रासस