इलाम, ४ पुस । नेकपा (एमाले) का वरिष्ठ नेता झलनाथ खनालले नयाँ संविधानले कसैलाई काखा र कसैलाई पाखा नगरेको बताउनुभएको छ ।

नेपाल उत्पीडित जातीय मुक्ति समाज इलामको २८औँ स्थापना दिवसका अवसरमा आयोजित कार्यक्रममा उहाँले संविधानले दलित, महिला, आदिवासी जनजाति, मधेसीलाई धेरै हक, अधिकार दिएको बताउँदै यसको सफल कार्यान्वयनमा जोड दिनुभयो । “मधेसमा केही टाठाबाठाले संविधान मधेस विरोधी छ, मधेसीको पक्षमा छैन भनेर भ्रम फिँजाइरहेका छन्, यो भन्नु किमार्थ ठीक होइन र यस्तो भ्रम फैलाउनु अपराध हो”–उहाँले भन्नुभयो ।

दलित, महिला, आदिवासी, मधेसीलगायत पिछडिएको समुदायको आधारभूत समस्या संविधानले सम्बोधन गरिसकेकाले संविधानमा कसैको हक अधिकार छुटेको भए संविधान संशोधनमार्फत अघि बढ्न सकिने उहाँको भनाइ छ । रासस