पुपाल यार्सा महोत्सव सुरु
रन्मामैकोट (रुकुम), ९ जेठ । बहुमूल्य जडीबुटी यार्सा (जीवनबुटी)को संरक्षण गर्दै त्यसको प्रचार–प्रसारलाई अन्तर्राष्ट्रिय क्षेत्रमा पु¥याउने उद्देश्यले रुकुमको उत्तरी क्षेत्रमा रहेको विकट गाउँ रुन्मामैकोट गाविसको हान्पामा पटक पुपाल यार्सा महोत्सव सुरु भएको छ ।
अन्तर्राष्ट्रिय जैविक विविधता दिवसका अवसरमा आजदेखि सुरु भएको महोत्सवको सभामुख ओनसरी घर्तीले उद्घाटन गर्नुभयो ।
समुद्र सतहदेखि करिब तीन हजार ३०० मिटरको उचाइमा रहेको हाल्पाडाँडामा महोत्सव आयोजना गरिएको कार्यक्रम संयोजक लक्ष्मीप्रसाद पुनले जानकारी दिनुभयो ।
नेपालमै पहिलो पटक आयोजित यार्सा महोत्सव यही जेठ २३ गतेसम्म सञ्चालन हुनेछ ।
कार्यक्रममा सभामुख घर्तीले दुर्लभ मानिने जैविक विविधताको संरक्षणका लागि वन मन्त्रालयबाट विधेयक आउन लागेको जानकारी पाएको बताउँदै ऐन नबनुन्जेलसम्म आफ्नो सहयोग रहने प्रतिबद्धता जनाउनुभयो ।
उद्घाटन कार्यक्रममा हेलिकप्टरबाट आउनुभएका सभामुख घर्तीसँगै वनमन्त्री अग्नि सापकोटा, आपूर्तिमन्त्री गणेशमान पुन, संसद्को सार्वजनिक लेखा समितिका संयोजक जनार्दन शर्माको समेत सहभागिता थियो ।
वनमन्त्री सापकोटाले मानवीय र जलवायु परिवर्तनका कारण यार्सा लोप हुँदै गएको बताउनुभयो । यसलाई जोगाउन सबै लाग्नुपर्ने र मन्त्रालयले पनि संरक्षणको पहल सुरु गरेको जानकारी उहाँले दिनुभयो ।
आपूर्तिमन्त्री पुनले यार्सा पर्यटन विकासका लागि पूर्वाधार निर्माणको काम थालिएको बताउनुभयो ।
वन मन्त्रालयका सहसचिव विजयराज पौडेलले महत्वपूर्ण जडीबुटी पाउने यो क्षेत्र विश्वमै उत्कृष्ट भएकाले यसको संरक्षण गर्न यसै क्षेत्रमा आएर दिवस मनाएको जानकारी दिनुभयो ।
महोत्सवस्थल रुकुमको सदरमुकाम मुसिकोट खलङ्गाबाट करिब ४२ कोष उत्तर पूर्वमा पर्छ । त्यहाँ पुग्न तीन दिन लाग्छ ।
नेपालभित्र उच्च गुणस्तरको यार्सा पाउने क्षेत्रका रुपमा पुपाल लेकलाई चिनिन्छ । दुई दिनपछि बन्दुक पड्काएर यार्सा सङ्कलन खुल्ला गर्ने तयारी भएकाले स्थानीयवासी परिवारसहित नै यार्सा पाउने क्षेत्रमा आवासीय रुपमा बस्न थालेका छन् ।
यो यार्सा शक्तिवद्र्धक जडीबुटीका रुपमा चिनिन्छ । यसको मूल्य गएको वर्ष प्रतिकिलो ३४ लाखसम्म परेको स्थानीयवासीले बताएका छन् ।
उद्घाटनका बेला स्थानीयवासीले आफ्नै मौलिक वेशभूषा, संस्कृति र नाचगान प्रस्तुत गरेका थिए । महोत्सवमा ३० वटा स्टल राखिएका छन् । रासस
