फेसबुकबाट फोटो मार्केटिङ 

-योगीशकृष्ण

मित्रवर बन्धु व्यस्त थियो । उ घरि घरि कसैलाई फोन गर्ने प्रयास गरिरहेको थियो । ऊ घरि तारेफोन त कहिले मोबाइलमा नम्बर डायल गरिरहन्थ्यो ।

यसलाई के भयो आज ? कुनै गम्भीर समस्यामा त परेन ?

उसले जबाफ दियो “समस्या नै समस्या छ । फोन नै लाग्दैन ।”

“ए बाबा । दूरसञ्चारको फोन हो । यसमा समस्या नभए केमा हुन्छ त । कहिले नेटवर्क बिजि घण्टौँसम्म भइराख्छ त कहिले सिग्नल अफ हुन्छ ।”

“तिमी कुरै बुझ्दैनौँ यार ।

म झापाका एक जना साथीलाई सम्पर्क गर्ने प्रयास गरिरहेको छु ।”

ऊ व्यस्त थियो । उसको फोन लागिरहेको थिएन । मेरो धैर्य समाप्त हुन लागेको थियो । म फर्किन के खोजेको थिएँ उसले पर्खने इशारा गर्यो, त्यसैगरी, जसरी व्यस्त नेताले कार्यकर्तालाई गर्छ ।

लामो सास तानेर छोडदै ऊसले भन्यो “लागेन यार । बिहानदेखि  फोन गर्न खोजेको लागेकै होइन ।”

बन्धुलाई झापाप्रति यत्रो मोह किन ?

उसले जबाफ दियो “म आठ नौ वर्षअघि उता गएको थिएँ ।”

“अनि के भो त ?”

“अनि के भो त ?”

उसले आँखा चिम्म गरेर केही सम्झेझैँ गरेर उसले भन्यो “त्यस दिन त्यस दिन झापामा केपी ओलीको कार्यक्रम थियो । मानिसहरु क्यामेरा र मोबाइलबाट फोटे खिचिरहेका थिए । कसैले खिचेको फोटोमा म पनि पक्कै देखिएको हुँला ।  त्यस्तै फोटो खोजिदिनका लागि  उसलार्इं फोन गर्न खोजेको लाग्दै लागेन ।”

“त्यतिखेर किन नखोजेको त । ”

त्यतिखेर भर्खर पहिलो सविधानसभाको निर्वाचन सकेको थियो । त्यही भएर ल्याइएन नि ।”

मलाई दिक्क लाग्यो” संविधानसभा निर्वाचन र फोटोको के सम्बन्ध ?

उसले जबाफ दियो संविधानसभा निर्वाचनमा एमालेको तेस्रो स्थान थियो । त्यसमाथि केपीले निर्वाचन हार्नु भएको थियो ।

उसको अर्थ न बर्थको जबाफ मैले बुझ्नै सकिँन ।

अन्तिममा मैले सोधेँ “त्यो फोटो किन चाहियो त अहिले ?”

उसले जबाफ दियो “ फेसबुकमा राख्न । मेरो पनि थोरै भए पनि मार्केट बढथ्यो कि ।”

मार्केट के गरी बढछ ?

केपीसँग बसेको फोटो फेसबुकमा राखेपछि मेरो मार्केट बढछ । उनी देशको प्रधानमन्त्री हुन् ।

बन्धुको मार्केट कसरी बढछ त्यो त मलाई थाहा छैन । हाम्रो मानसिकताको मार्केट मैले बुझेर सुझाव दिएँ हेर, तिमीले खोजेको फोटो पाउँछौ कि पाउँदैनौ, थाहा छैन । पोहर साल तिमी नेपालगञ्जका साथीलाई फोन गर्दै थियौ । यस वर्ष झापा फोन गर्दै छौ । अब भविष्यका लागि तयारी आरम्भ गर ।

बन्धु भविष्यको तयारीमा जुटेको छ ।

पाठकहरु,नेताहरूको नजिक बसेर फोटो खिचाउने मानिस कतै दखियो भने चिन्नूस्, त्यो मेरो मित्र बन्धु हो  ।

(yogiskrishna81@gmail.com)