काठमाडौँ, १६ कात्तिक । राष्ट्रपति विद्यादेवी भण्डारीलाई युवा सङ्घ नेपालले आज बधाई दिएको छ ।

सङ्घका पूर्व इन्चार्च तथा पदाधिकारीसहितको प्रतिनिधि मण्डलले शीतलनिवासस्थित राष्ट्रपति कार्यालयमा भेट गरी उहाँको कार्यकालको सफलताको कामना गर्दै शुभकामना दिएको हो ।

नेकपा (एमाले)का पोलिटब्युरो सदस्य भानुभक्त ढकाल, पार्टीका केन्द्रीय सदस्य शेरधन राई, सङ्घका अध्यक्ष राजिव पहारी तथा पूर्वअध्यक्ष निरु पालसहितको प्रतिनिधि मण्डल त्यहाँ पुगेको हो ।

उक्त भेटघाटका क्रममा राष्ट्रपति भण्डारीले संविधानबाट प्रदत्त राष्ट्रपति पदको गरिमालाई कायम गर्दै संविधानको संरक्षणमा भूमिका निर्वाह गरी देश र जनताको हितमा काम गर्ने प्रतिबद्धता व्यक्त गर्नुभएको सङ्घका प्रवक्ता प्रभातविक्रम कटुवालले जानकारी दिनुभयो ।

यसैबिच, राष्ट्रपति भण्डारीले स्वकीय सचिवमा झापा तोपगाछी–४ का भेषराज अधिकारीलाई नियुक्त गर्नुभएको छ ।

राष्ट्रपति कार्यालयका उपसचिव हरिप्रसाद दवाडीले आज जारी गर्नुभएको विज्ञप्तिमा जनाइएअनुसार राष्ट्रपति भण्डारीले राजपत्राङ्कित विशिष्ठ श्रेणी सरहको स्वकीय सचिव पदमा अधिकारीलाई नियुक्त गर्नुभएको हो । रासस