काठमाडौँ, २४ कात्तिक । द टिम्बर कर्पाेरेसन अफ नेपाल लिमिटेडले मुलुकमा देखिएको ऊर्जाको सङ्कट टार्न सर्वसाधारणलाई दाउरा बिक्रीवितरण गर्ने भएको छ ।

वन तथा भू–संरक्षण मन्त्रालयको आजको निर्णयपछि टिम्बरले तिहारअघि नै राजधानीमा सर्वसाधारण तथा आवश्यक निकायलाई खाना पकाउन ३०० चट्टा दाउरा भित्र्याएर बिक्रीवितरण गर्र्ने तयारी थालेको छ ।

वनमन्त्री अग्निप्रसाद सापकोटाको निर्देशनपछि टिम्बरले राजधानीवासीलाई तत्काल वैकल्पिक ऊर्जाका रुपमा दाउरा उपलब्ध गराउन बिदामा समेत काम गर्नेगरी तयारी थालेको मन्त्रीका स्वकीय सचिव युवराज दुलालले राससलाई जानकारी दिनुभयो ।

मन्त्री सापकोटाको निर्देशनलगत्तै टिम्बरले मुलुकका विभिन्न भागबाट दाउरा ढुवानीका लागि भन्दै नेपाल आयल निगमसँग इन्धनका माग गर्दै पत्राचार गरेको टिम्बरले जनाएको छ ।

टिम्बरले वन व्यस्थापनबाट प्राप्त हुने काठ दाउरा व्यवस्थित रुपले चिरानसमेत गरी सरकारका तर्फबाट सर्वसाधारण, दैवीप्रकोप पीडित परिवार, कृषि औजार, दाहसंस्कारलगायत कार्यलाई सहुलियत एवम् निश्चित मूल्यमा र औद्यौगिक तथा व्यापारिक प्रयोजनका लागि सरल तथा सर्वसुलभ आपूर्तिको काम गर्दै आएको छ । रासस