राष्ट्रपति, उपराष्ट्रपति र प्रधानमन्त्रीद्वारा कमलपोखरीमा छठको पूजाअर्चना
काठमाडौँ, १ मङ्सिर । छठपर्वको अवसरमा आज राष्ट्रपति विद्यादेवी भण्डारी, उपराष्ट्रपति नन्दबहादुर पुन र प्रधानमन्त्री केपी शर्मा ओलीले आज साँझ कमलपोखरी पुगी छुट्टाछुट्टै पूजाअर्चना गर्नुभएको छ ।
सो अवसरमा उहाँहरुले कमलपोखरीमा अस्ताउँदो सूर्यको पूजा गर्नुभएको थियो । पूजाका लागि उहाँहरु त्यहाँ पुग्दा स्थानीय र भक्तजनले ताली बजाएर स्वागत गर्नुभएको थियो ।
सूर्यदेवको श्रद्धाभक्तिपूर्वक आराधना र पूजा गरी मनाइने छठको अवसरमा कमलपोखरीमा सरसफाइका साथै ध्वजापताका र झिलीमिली बत्तीले सिङ्गारिएको थियो । उहाँहरुले त्यस क्षेत्रमा पूजाका लागि सजाइएको पोखरी किनाराको अवलोकनसमेत गर्नुभयो ।
छठपर्वको मुख्य दिन आज भक्तालुले पूजा सामग्री, फलफूल र मिठाईका साथ बेलुकी अस्ताउँदो सूर्यलाई अर्घ दिई पूजा सुरु गरेका छन् ।
कात्तिक शुक्ल चतुर्थीदेखि सप्तमीसम्म मनाइने सूर्यदेवको आराधना, उपासना र पूजाको पर्व आइतबारदेखि सुरु भएको हो । मनोकाङ्क्षा पूरा हुने विश्वासमा महिलाले छठमा कठोर व्रत गर्ने गर्छन् । विशेषगरी तराईमा मनाइने मिथिला संस्कृतिमा आधारित छठपर्व पछिल्लो समय काठमाडौँलगायत पहाडी क्षेत्रमा पनि धुमधामका साथ मनाउन थालिएको छ ।
समस्या समाधानका लागि सरकार गम्भीर – प्रम ओली
छठको पूजापछि संक्षिप्त प्रतिक्रिया दिँदै प्रधानमन्त्री केपी शर्मा ओलीले देशमा देखिएको असहज अवस्थाको समाधानका लागि सरकार गम्भीर रहेको बताउनुभयो ।
उहाँले अहिलेको समस्याबाट सबैभन्दा बढी मधेसी जनताले नै दुःखकष्ट व्यहोर्नुपरेको बताउँदै त्यसबाट आफू दुःखी भएको बताउनुभयो । उहाँले भन्नुभयो, “भोलिनै निष्कर्षको वार्ता होस् भन्ने मेरो चाहना हो, मेरो लागि त भोलि पनि ढिलो भइरहेको छ, त्योभन्दा पनि अगाडि समस्या समाधान गरौँ ।”
उहाँले सबै मिलेर जानुको विकल्प नरहेको बताउँदै एक अर्कामा मिलेर देश बनाउनुपर्नेमा जोड दिनुभयो । उहाँले भन्नुभयो, “हामी सबै दाइ–भाइ र दिदीबहिनी हौँ, एक अर्कामा पाखुरा सुर्कासुकी गरेर, झगडा गरेर अहङ्कार गर्न हुँदैन । यो अरुसँगका कुरा होइन, हाम्रै आफ्नै कुरा हो ।”
उहाँले समस्या समाधानका लागि कुनै भ्रम र जिद्धी नराख्न आग्रह गर्दै आफू पनि कुनै अहङ्कार र जिद्धी नराखी आत्मीय ढङ्गले कुरा गरेर यथार्थमा समस्या समाधान गर्न चाहेको बताउनुभयो ।
उहाँले ग्यासको अभावमा दाउरा, मट्टितेल, गुइँठा जे ल्याएर भए पनि जनताको चुलो बाल्न आफूहरु प्रयत्नशील रहेको जानकारी पनि दिनुभयो । रासस