प्याक्टद्वारा साताव्यापी तालिम आयोजना
काठमाण्डौं । २५ पुस : व्यवसायिक कृषि तथा व्यापार आयोजना (प्याक्ट) ले मध्यमाञ्चल विकास क्षेत्रका १९ जिल्लाका जिल्ला कृषि विकास कार्याल तथा जिल्ला पशुसेवा कार्यालयमा कार्यरत आफ्ना सम्पर्क व्यक्ति (फोकल पर्सन) हरुका लागि ६ दिने तालिम आयोजना गरेको छ । तालिम पुस २४ गते सम्पन्न भएको आयोजनाले जनाएको छ । तालिम आयोजनाको क्षेत्रीय कार्यालय आयोजना कार्यान्वयन सहयोग समूहको कार्यालयले सञ्चालन गरेको हो ।
दुई भागमा विभाजित तालिमको पहिलो चरण उपआयोजनाहरुको अनुगमन तथा मूल्यांकन र प्रतिवेदन लेखनमा केन्द्रीत गरिएको थियो । पहिलो दिनको तालिमपछि सहभागीहरुलाई काठमाडौं र ललितपुरमा प्याक्टको पूरक अनुदानमा सञ्चालित उपआयोजनाहरुको स्थलगत भ्रमण गराई ती उपआयोजनाका गतिविधिको अनुगमन गर्ने व्यवस्था मिलाइएको थियो । अनुगमन गरिएका संस्थाहरु, बल्खुस्थित सूर्यकमल प्रालि , ललितपुरको थेचोस्थित प्रतिभा हुउद्देश्यीय सहकारी संस्था लिमिटेड तथा पाटन औद्योगिक क्षेत्रस्थित शक्ति फूड प्रालि रहेको आयोजनाले जनाएको छ । सूर्यकमलले तरकारीको बजारीकरण, प्रतिभा सहकारीले मासु तथा मासुजन्य पदार्थको उत्पादन तथा बजारीकरण तथा शक्ति फूडले दुगधजन्य पदार्थ आइसक्रिमको उत्पादन तथा बजारीकरण उपआयोजनाहरु सञ्चालन गर्दैआएका छन् । सूर्यकमलले सञ्चालन गरेको उपआयोजना भर्खरै सम्पन्न भएको छ भने शक्ति फूडले दोस्रो किस्ताको तयारी गरेको छ । प्रतिभाले भने आयोजनाले प्रदान गर्ने पूरक अनुदानको पहिलो किस्ताको रकम लैजाने तयारी गरेको तालिम आयोजकहरुले बताए । आयोजना प्रदान गरिने पूरक अनुदान दुई देखि चार किस्तामा प्रदान गरिन्छ । सहभागीहरुले तीनैवटा संस्थाले प्याक्टको पूरक अनुदानमा सञ्चालन गरेका उपआयोजनाहरु दिगोरुुपमा सञ्चालन हुने लक्षण देखिएको प्रतिक्रिया दिए ।
दोस्रो चरणको तालिम मूल्यशृंखला विकाससँंग सम्वद्ध थियो । तालिमका सहभागीहरुले २ समूहमा विभाजन भई कफी तथा याक चिजको मुल्यशृंखला अध्ययन गरी निचोड प्रस्तुत गरेका थिए । तीमध्ये एक समूहले गरेको सानो अध्ययनमा रसुवामा उत्पादित याक चिज काठमाडौंको बजारसम्म आइपुग्दा एक हजार रुपैयाँ मूल्य पर्ने तथा उक्त चिज बजारमा साढे १२ सयमा बिक्री हुने निचोड निकालेको थियो ।
तालिमको समापन गर्दै आयोजना निर्देशक डा. इन्द्रकान्त झाले सहभागीहरुलाई प्रमाण पत्र प्रदान गर्नुभयो । उहाँले सहभागीहरुले उठाएका आयोजनासँंग सम्बद्ध प्रश्नहरुको जवाफ पनि दिनुभएको थियो ।