बालबालिका उच्च जोखिममा
भक्तपुर, १० असार । भक्तपुरमा दुई हजार १४२ जना बालबालिका उच्च जोखिममा रहेका छन् । तीमध्ये ९८० जना बालक र एक हजार १६२ जना बालिका रहेको जिल्ला बालकल्याण समिति भक्तपुरले जनाएको छ ।
समितिका अनुसार बाबुआमा वा उमेर पुगेका एकाघरका नातेदारबाट अलगिएका ११० बालक र १७४ बालिका रहेका छन् भने कुनै पनि बयस्कको संरक्षणमा नरहेका आठ बालक एक बालिका रहेका छन् । त्यसैगरी जोखिममा परेर आवासीय बालगृहमा रहेका १२ बालक र १४ बालिका रहेका छन् भने विभिन्नखाले जोखिममा परेका ८५० बालक र ९७३ बालिका रहेका छन् ।
समितिले गत वर्षको भूकम्पपछि जिल्लामा भूकम्प र अन्य कारणले जोखिममा रहेका बालबालिकाको स्थलगत सर्वेक्षण गरेको थियो । सो सर्वेक्षणअनुसार जिल्लाका छ नगरपालिकामध्ये सबैभन्दा बढी भक्तपुर नपामा २४८ बालक र २४९ जना बालिका गरी कुल ४९७ जना जोखिममा रहेको जिल्ला बालकल्याण अधिकृत सुशीला सिंखडाले जानकारी दिनुभयो ।
त्यसैगरी, मध्यपुर थिमिमा १९१ बालक र २८४ बालिका, चाँगुनारायण नपामा १६९ बालक र १८१ बालिका, सूर्यविनायक नपामा १२७ बालक र १५० बालिका, नगरकोट नपामा १६९ बालक र १७२ बालिका, अनन्तलिङ्गेश्वर नपामा ७६ बालक र १२६ बालिका जोखिममा रहेका छन् ।
सर्वेक्षणका क्रममा जिल्लामा १६६ बालक र २५७ जना बालिका बालश्रमिकका रुपमा कार्यरत रहेको पाइएको महिला विकास अधिकृत निलाकुमारी घिमिरेले जानकारी दिनुभयो ।
भूकम्पपछि गरिएको सर्वेक्षणमा धेरैजसो बालबालिका मानसिक तनावमा रहेको पाइएको बताउँदै परिवारको आर्थिक अवस्था कमजोर, अभिभावक गुमाएको र घरेलु हिंसाको सिकार भएपछि बाध्य भई होटल, गलैँचा कारखाना, जरी कारखानालगायतका स्थानमा बालमजदुरका रुपमा कार्य गर्न बाध्य हुनुपरेको अवस्थासमेत रहेको उहाँले जानकारी दिनुभयो । रासस