लोपोन्मुख चर्या नृत्य ‘बज्र सरस्वती’ मञ्चन
काठमाडौँ, १४ असार । नेवा डान्स एकेडेमीले विलुप्त हुन लागेको ‘बज्र सरस्वती’ को चर्या नृत्य मञ्चन गरेको छ ।
लोपोन्मुख यस नृत्यलाई पहिलो पटक बौद्ध विद्वान् यज्ञमानपति बज्राचार्यको निर्देशनमा कोरियोग्राफरद्वय रोहिया महर्जन र रीना महर्जनले गएको शुक्रबार एनडिए क्लासिकल नाइटमा सुन्दर ढङ्गले प्रस्तुत गर्नुभएको हो । चर्या नृत्य बज्रयान बुद्धधर्मका अनुयायीहरुले गर्ने एक आराधना हो ।
महिनौँदेखिको अभ्यासपछि यो चर्या नृत्य सिक्न आफूहरु सफल भएको र यसका लागि जप र ध्यान गर्नुपर्ने गुरु यज्ञमानको पूर्व सर्तलाई आफूले पालना गरेको एकेडेमीका अध्यक्ष महर्जनले बताउनुभयो ।
महाविद्यालयको शिक्षामा यो नृत्यको प्रसङ्ग रहे पनि कोही पनि गुरुले यसलाई पूर्णतः सिकाउन सक्ने स्थिति नरहेकाले आफूले यो नृत्यलाई कठिन भए पनि उजिल्याउन प्रयास गरेको महर्जनको भनाइ छ । व्यवहारमा गुरुबाट सिकाउने नृत्यमा चार अन्तरा रहेको तर वास्तवमै यो नृत्य पाँच अन्तरामा हुनुपर्ने उहाँले बताउनुभयो ।
आठौँ शताब्दीमा साँखु निवासी पं केदार बज्राचार्यद्वारा रचित कृष्णप्रणामी तन्त्रमा बज्र सरस्वतीको तीन वटा रुप र छ वटा हातको परिकल्पना गरिएको छ । यो देवीको मूल शिक्षा मध्यमार्गी बनी समयमै काम फत्ते गर्नु र पाँच इन्द्रियलाई वशमा राख्नु हो ।
उक्त कार्यक्रममा एकेडेमीले भरत नाट्यममा प्रशिक्षण लिइरहेका ५० भन्दा बढी प्रशिक्षार्थीलाई डबलीमा उतारेको थियो । उनीहरुलाई प्रशिक्षक सन्तोष राठीले एक महिना लामो प्रशिक्षण दिनुभएको थियो ।
कार्यक्रमको प्रमुख अतिथि नेपाल सङ्गीत तथा नाट्य प्रतिष्ठानका कुलपति सरुभक्त हुनुहुन्थ्यो । सात वर्षअघि स्थापित यस एकेडेमीले शोभाभगवती ढल्कोमा नियमित नृत्य कक्षा सञ्चालन गर्दै आएको छ । रासस