एयरबस खरिदबापतको पाँचौँ किस्ता तिरियो
काठमाडौँ, ३० असार । नेपाल वायु सेवा निगमले एयरबस ३२०–२०० खरिदबापतको पाँचौँ किस्ता रकम आज कर्मचारी सञ्चयकोषलाई तिरेको छ ।
एयरबस खरिदबापतको किस्ता तीन महिना (वैशाख, जेठ र असार) को रु ३२ करोड ३६ लाख १७ हजार ४२१ रकम बुझाइएको निगमका निर्देशक एवम् प्रवक्ता रामहरि शर्माले राससलाई जानकारी दिनुभयो ।
योसहित निगमले हालसम्म कोषलाई रु एक अर्ब ५८ करोड बुझाइसकेको छ । यसअघि चार किस्ता गरेर रु एक अर्ब २६ करोड बुझाएको थियो ।
निगमले झन्डै डेढ वर्षअघि जर्मनको एयरबस कम्पनीबाट रु १० अर्बमा कल साइन ‘नाइनएन–एकेडब्लु÷नाइनएन–एकेएक्स’ दुई एयरबस खरिद गरेको थियो । उक्त रकम कर्मचारी सञ्चय कोषबाट ऋण लिएको थियो । निगमले हरेक तीन महिनामा कोषलाई किस्ता रकम तिर्नेगरी १५ वर्षका लागि ऋण लिएको हो ।
प्रवक्ता शर्माका अनुसार निगमको अन्तर्राष्ट्रिय उडानका लागि चार वटा विमान रहे पनि अहिले दुई वटाले मात्र उडान भरिरहेका छन् । यीमध्ये एक एयरबस एकसाताअघि चरा ठोक्किएर इन्जिनमा खराबी देखिएपछि ग्राउन्डेड भएको छ, भने एउटा पुरानो लिलाममा बिक्रीका लागि तयारी भइरहेको छ । ग्राउन्डेड एयरबस केही दिनमै मर्मतपछि सञ्चालनमा आउने पनि निगमले जनाएको छ ।
निगमले हाल पाँच देशका सात गन्तव्य क्रमशः भारतको नयाँ दिल्ली, मुम्बई र बैङ्लोर, थाइल्यान्डको बैंकक, हङ्कङ, मलेसियाको क्लालालम्पुर र कतारको दोहा उडान भर्दै आएको छ । अब अर्को आठौँ गन्तव्य दुबई उडान भर्ने निगमको तयारी गरेको छ । आगामी भदौ २ गतेबाट काठमाडौँ–दुबई हप्ताको तीन पटक (मङ्गलबार, बिहीबार र आइतबार) उडान भर्ने प्रवक्ता शर्माले बताउनुभयो । पछिल्ला दिनमा निगको व्यावसायिक कारोबार पनि राम्रो रहेको कम्पनीले जनाएको छ । रासस