पर्यटनबाट उचित लाभ लिन नसक्नु विडम्बनाः सभापति देउवा
काठमाडौँ, ३ भदौ । नेपाली काँग्रेसका सभापति शेरबहादुर देउवाले मुलुकको आर्थिक समृद्धिको दरिलो आधारका रुपमा रहेको पर्यटन क्षेत्रको विकासका लागि पूर्वाधार विकासमा जोड दिनुभएको छ ।
पर्यटनसम्बन्धी पत्रिका गन्तव्य नेपालको १२औँ वार्षिकोत्सवको यहाँ आज उद्घाटन गर्दै उहाँले प्राकृतिक, भौगोलिक र धार्मिक तथा सांस्कृतिक रुपमा नेपालको पर्यटनको प्रचुर सम्भावना रहे पनि अपेक्षित लाभ लिन नसक्नु विडम्बना हो भन्नुभयो ।
उहाँले प्राकृतिक सुन्दरता र जैविक विविधतायुक्त पर्यटकीय स्थलको वातावरण र जैविक विविधता संरक्षणलाई ध्यान दिई भौतिक पूर्वाधार विकास गरेर मात्र नयाँ पर्यटकीय गन्तव्यको विस्तार गरिनुपर्नेमा जोड दिनुभयो ।
एक अर्को प्रशङ्गमा सत्ता साझेदार प्रमुख काँग्रेस सभापति देउवाले छिट्टै मन्त्रिमण्डलले पूर्णता पाउने र देश विकासका कामलाई प्रभावकारी रुपमा अघि बढाइने उल्लेख गर्नुभयो ।
कार्यक्रममा नेपाली काँग्रेसका केन्द्रीय सदस्य अर्जुननरसिंह केसीले प्राकृतिक विविधताले भरिपूर्ण नेपालको पर्यटन विकासका लागि सबै क्षेत्र एकीकृत ढङ्गले लाग्नुपर्ने खाँचो औँल्याउनुभयो । सांसद जगदिशनरसिंह केसी, पूर्व पर्यटनराज्यमन्त्री दिलीप महर्जन र नेकपा (एमाले) पर्यटन विभाग प्रमुख सूर्य थापाले पर्यटन विकासका लागि पूर्वाधार विकासमा जोड दिनुभयो ।
नेपाल पर्यटन बोर्डका सञ्चालक समिति सदस्य राजेन्द्रप्रसाद सापकोटा, पर्यटन व्यवसायी मोहन लम्साल, ठमेल पर्यटन विकास परिषद्का अध्यक्ष रामशरण थपलिया र गन्तव्य नेपालका अध्यक्ष शिव अधिकारीले पर्यटकीय पूर्वाधार विकासका लागि राज्यको ध्यान जानुपर्नेे बताउनुभयो ।
यसैबीच गन्तव्य नेपालले ‘टुरिजम म्यान अफ दी इयर’बाट वरिष्ठ पर्यटन व्यवसायी मोहन लम्साललाई सम्मानित गरेको छ । त्यस्तै नगद रु १० हजार राशिको गन्तव्य नेपाल पत्रकारिता पुरस्कारबाट राजधानी दैनिकका मधुजङ पाण्डे र इमेज टेलिभिजनका प्रतीक लामिछानेलाई सम्मान गरिएको छ ।
त्यसैगरी पर्यटनका क्षेत्रमा उल्लेख्य योगदान गरेबापत पर्यटन व्यवसायी भवन भट्ट, प्रेमकुमार खत्री, सङ्घर्ष विष्ट, सागर विष्ट, चूडामणि दाहाल र रवीन्द्रराज पौडेललाई सम्मान गरिएको छ । रासस