महिला उद्यमशीलता विकासमा जोड
काठमाडौँ, ५ असोज । उद्योगमन्त्री नविन्द्रराज जोशीले महिला उद्यमशीलता विकासले समग्र राष्ट्रको विकासको गति बढाउन सकिने बताउनुभएको छ ।
केयर नेपालले सञ्चालन गरेको सफल महिला उद्यमी अभिप्रेरणा अभियानअन्तर्गत आज आयोजना गरेको ‘लघु उद्यमशीलता विकासमा भएका नीतिगत व्यवस्था, विद्यमान चुनौती र अभ्यास’ विषयक छलफलमा उहाँले
एक सफल महिलाको उदाहरण हेरेर समाजका अन्य धेरै महिलालाई प्रोत्साहन मिल्ने धारणा राख्नु भयो ।
मुलुकमा विकासको सम्भावना प्रशस्तै भएपनि यस्ता सम्भावनाहरूको सही उपयोग गर्न नसक्दा विकासको गति सुस्त उल्लेख गर्दै उहाँले महिला उद्यमशीलता विकासमा प्रभावकारी नीति नियम र कार्य पद्धति बनाएर अघि बढ्न सरकार तयार रहेको बताउनुभयो ।
केयर नेपालकी राष्ट्रिय निर्देशक लोरा विनेनवर्गले उद्यमशिलता विकासमा नेपाल सरकारले गरिरहेको प्रयासमा सहयोगीको भूमिका निर्वाह गर्न केएर नेपाल सधै तयार रहेको धारणा राख्नुभयो ।
केयर नेपालका कार्यक्रम निर्देशक डा पपुलर जेन्टलले पछिल्लो समयमा महिला उद्यमशीलताका सफल उदाहरणहरू बढ्न थालेको र अझ व्यवस्थित गर्नुपर्नेमा जोड दिनुभयो ।
कार्यक्रममा महिला उद्यमी अभिप्रेरणा अभियान अन्तर्गत तयार गरिएको ‘उद्यमी हातहरू’ नामक उद्यमी महिलाहरूको उद्यमशिलता सम्वन्धी पुस्तक मन्त्री जोशीले सार्वजनिक गर्नुभयो । रासस