‘दोस्रो राष्ट्रिय आप्रवास सम्मेलन’ सुरु
काठमाडौँ, ११ असोज । श्रम तथा रोजगारमन्त्री सूर्यमान गुरुङले ‘दोस्रो राष्ट्रिय आप्रवास सम्मेलन’ आज यहाँ उद्घाटन गर्नुभयो । अन्तर्राष्ट्रिय आप्रवास सङ्गठन (आइओएम), दी एसिया फाउन्डेसन, माइती नेपाललगायत आप्रवासका क्षेत्रमा क्रियाशील १४ सङ्गठनको संयुक्त अयोजनमा सो सम्मेलन सुरु भएको हो ।
आप्रवास समस्या, चुनौती र त्यसको समाधनमा केन्द्रित रहेर दुई दिनसम्म चल्ने सम्मेलनमा वैदेशिक रोजगारीका लागि जाने कामदारको अधिकार, तालिम, स्वास्थ्य समस्या, विप्रेषणको सदुपयोग, निःशुल्क टिकट र प्रवेशाज्ञाको कार्यान्वयन, घरेलु कामदारको समस्या तथा आप्रवास र मानव बेचबिखनबीचको अन्तरसम्बन्ध लगायतका विषय छलफल हुने आयोजकले बताएको छ ।
सो अवसरमा मन्त्री गुरुङले वैदेशिक रोजगारलाई व्यवस्थित र मर्यादित बनाउन सम्मेलनले महत्वपूर्ण भूमिका निर्वाह गर्ने बताउँदै आप्रवास समस्या समाधान गर्नु सरकारको प्राथमिकता रहको र त्यसका लागि आवश्यक गृहकार्य सुरु गरिसकेको बताउनुभयो ।
श्रम तथा रोजगार मन्त्रालयका प्रवक्ता गोविन्दमणि भुर्तेलले वैदेशिक रोजगारी शोषणमुक्त हुनुपर्ने संवैधानिक व्यवस्थालाई कार्यान्वयन गर्नु नै अहिलेको आवश्यकता हो भन्नुभयो ।
माइती नेपालका अध्यक्ष अनुराधा कोइरालाले आप्रवास समस्याले नेपालमा विकाराल रुप लिए पनि त्यसको समाधानका विषयमा ढिलो बहस सुरु भएको बताउनुभयो ।
सुरक्षित आप्रवासका लागि नागरिक सञ्जालका अध्यक्ष सिद्धिचन्द्र बरालले आप्रवासका विषयमा साझा धारणा तय गर्न सम्मेलनको आयोजना गरिएको बताउनुभयो । रासस