लोकमानका नाममा म्याद तामेल; म्याद तामेल नगर्ने कर्मचारीलाई १५ दिन जेल, एक हजार जरिवाना
काठमाडौं, २ कात्तिक । अख्यितार प्रमुख लोकमानसिंह कार्कीको नाममा धेरै पटकको प्रयास पछि मंगलबार म्याद तामेल भएको छ ।
सर्वोच्चका प्रवत्ता नहकुल सुवेदीले अख्तियार प्रमुख लोकमानसिंह कार्कीको नियुक्ति विवाद पुनरावलोकन हुन भन्दै अदालतमा उपस्थित हुन काटिएको म्याद तामेल भएको जनाकारी गराएका हुन ।
सोमबार बिहान बानेश्वर हाइटस्थित लोकमानसिंह कार्कीको घरमा म्याद टाँस्न गएका सर्वोच्च अदालतका कर्मचारीलाई त्यहाँ उपस्थित करिब १ दर्जन युवाहरूको समूहले म्याद टाँस्न नदिएपछि सर्वोच्च अदालतका दुई तामेलदार म्याद नटाँसी फर्किएका थिए । म्याद टाँस्न असफल भएपछि उनीहरु वडासचिवको सहयोग लिन वडा कार्यालय गएका थिए ।
अख्तियार प्रमुखमा नियुक्त हुन कार्कीको वैधानिकता नपुगेको भन्दै आदालतमा दर्ता भएको पुरानो मुद्धाको पुनरावलोक गर्ने सर्वोच्चको निर्णय पछि कार्कीलाई अदालतमा उपस्थित हुन म्याद टाँसिएको हो ।
पुनरावलोकनको निर्णयलगत्तै अख्तियार प्रमुख कार्की आफ्नो पूर्वनिर्धारित क्यानडा गएका थिए । सरकारी भ्रमण सकिएपछि उनी विदा लिएर पछिल्लो एक महिनादेखि क्यानडामै बसिरहेका छन् ।
सर्वोच्च अदालतले अख्तियार प्रमुख लोकमानसिंह कार्कीको घरमा विभिन्न बाहनाबाजी बनाएर म्याद तामेल नगरी फर्किएका तीन कर्मचारीलाई कारबाही गर्ने भएको छ । सर्वोच्चले तामेलदार शम्भुबहादुर खत्रीसहित तीन कर्मचारीमाथि कारवाहीको प्रक्रिया अघि बढाएको हो ।
तामेलदार खत्रीले बहानाबाजी गरेर म्याद तामेल नगरेको आशंका गर्दै अदालतले स्पष्टीकरण मागेको छ । सात दिनभित्र चित्तबुझ्दो स्पष्टीकरण नआएमा कारबाही गर्ने सर्वोच्च प्रशासनले जनाएको छ ।
काठमाडौं महानगरपालिका वडा नं १० की अधिकृत सरिता राई र खरीदार भेषराज अर्यालसमेत कारबाहीको दायरामा परेका छन् । उनीहरु दोषी ठहरिए मुलुकी ऐनको १ सय ११ बमोजिम १५ दिन जेल र एक हजार रुपैयाँ जरिवाना हुनेछ ।
अधिकृत राई र खरिदार अर्यालले म्याद तामेलीमा असहयोग गरेको अदालतको ठहर छ । सर्वोच्च अदालतका न्यायाधीश ईश्वरप्रसाद खतिवडाको एकल इजलासले स्पष्टीकरण सोध्ने आदेश दिएको हो ।