अन्तर्राष्ट्रिय ‘याक अट्याक’ साइकल दौड सुरु
लमजुङ, २० कात्तिक । विश्वकै उच्च हिमाली भेगमा आयोजना हुने ‘याक अट्याक’ साइकल दौड प्रतियोगिताको दसौँ संस्करण आज यहाँ सुरु भएको छ ।
बेलायतस्थित माउन्टेन बाइकिङ वल्र्ड वाइडको आयोजना र नेपालस्थित यति ग्रुप अफ कम्पनीअन्तर्गत यति ट्रेल्सको व्यवस्थापनमा सञ्चालन भएको प्रतियोगिता उच्च हिमाली क्षेत्रअन्तर्गत अन्नपूर्ण पदमार्गमा आयोजना गरिएको ‘याक अट्याक २०१६’ साइकल दौड प्रतियोगिता आजबाट बेसिसहरबाट सुरु भएको हो ।
समुन्द्री सतहदेखि पाँच हजार ४१६ मिटर उचाइमा पर्ने थोराङ्ला भञ्ज्याङ पास गर्ने गरी प्रतियोगिता सुरु भएको हो । १२ दिनसम्म हुने प्रतियोगितामा बीचमा दुई दिन आराम गरिनेछ ।
प्रतियोगितामा नेपालसहित १४ देशका प्रतियोगी सहभागी छन् । प्रतियोगितामा अमेरिका, बेलायत, सिङ्गापुर, जापान, हङ्गेरी, फ्रान्स, अस्ट्रेलिया, अस्ट्रिया, न्युजिल्याण्ड, पोर्चुगल, मलेसिया, क्यानाडा र डेनमार्कका गरी ३९ जना प्रतियोगी सहभागी रहेका छन् ।
अघिल्ला वर्षहरुमा आयोजना गरीएका प्रतियोगितामा नेपाली युवा अजय पण्डित पाँच पटकसम्म लगातार विजेता बनेका थिए ।
प्रतियोगितामा प्रथम हुनेले एक हजार २५० अमेरिकी डलर पुरस्कार प्राप्त गर्नेछन् । यस्तै दोस्रो हुनेले ७५० डलर र तेस्रोले ५०० डलर पुरस्कार प्राप्त गर्नेछन् ।
पहिलो दिन जिल्लाभित्रै ३२ किलोमिटर दुरीमा प्रतियोगिता गराइएको छ । सदरमुकाम बेसीसहरबाट सुरु भएर चण्डीडाँडा, बाग्लुङपानी, घलेगाउँ फेदी हुँदै भलाम, सिम्पानी, खुदी भएर बेसीसहर आएर टुङ्गिएको छ ।
आइतबार भने प्रतियोगीहरु मनाङको सदरमुकाम चामे पुग्नेछन् । १० दिनको प्रतियोगितामा सबैभन्दा कम समयमा पुरै दौड जित्नेले मात्रै उपाधि हात पार्नेछन् ।
प्रतियोगिताको लागि नेपालको उच्च हिमाली क्षेत्र उत्तम भएकाले प्रत्येक वर्ष नेपालमा प्रतियोगिता आयोजना गरिएको माउन्टेन बाइकिङ वल्र्ड वाइडका निर्देशक फिल इभान्सले बताउनुभयो ।
प्रतियोगिताबाट नेपालको पर्यटन प्रर्वद्धनका लागि सहयोग पुग्ने विश्वास गरिएको छ । रासस