अस्ताउँदो सूर्यलाई अर्र्घ चढाइयो; विशिष्ठ व्यक्तिद्वारा छठ पूजा
जनकपुरधाम, २१ कात्तिक । आस्थाको महापर्व छठअन्तर्गत आज तेस्रो दिन व्रतालुले यहाँ अस्ताउँदो सूर्यलाई अर्र्घ अर्पण गरी पूजाअर्चना गरेका छन् ।
यहाँका इतिहास वर्णित सरोवर गङ्गासागर, धनुषसागर, अरगजा, रत्नसागर, महाराजसागर, विषहर, मुरलीसर, अग्निकुण्डलगायतका पोखरीमा अर्घ सामग्री लिई सूर्यलाई पूजाअर्चना गरेका हुन् ।
अर्र्घ सामग्रीमा ठकुवा, कसार, केरा, उखु्, मेवा, मिष्ठान, गेडागुडी, कन्दमूल र विभिन्न वनस्पति राख्ने परम्परा रहेको छ । आजको दिनलाई मूल दिन पनि भनिन्छ । यस पर्वमा भुसवा र कृषिजन्य अन्नको पीठोबाट बनाइएका पकवानसँगै केराको घरी, माटोको हात्ती, सुप, कनसुपती, कलशसहितको घैँटो आदि सामग्रीको स्वच्छता र पवित्रतापूर्वक व्यवस्था गरिन्छ र साँझतिर अस्ताउने सूर्यको नमन गर्दै अर्घ दिइन्छ ।
छठ पर्व नै यस्तो पर्व हो जसमा अस्ताउँदो सूर्यलाई पनि पूजा गर्ने परम्परा रहेको छ । सूर्यलाई ‘आदि’ देवता पनि भनिन्छ । मानवलाई उज्यालो दिने, जिउमा गर्मी उत्पन्न गर्ने र रोगव्याधिबाट जोगाउने सूर्य नै भएको मान्यता पाइन्छ । त्यसैले सूर्यलाई एउटा अभीष्ट देवताका रूपमा वैदिक कालदेखि नै पुजिएको छ ।
वैदिक साहित्यको मुख्य सार नै सूर्य उपासना रहेको छ । वेदमा सूर्यलाई ऐश्वर्यका रूपमा मानिएको छ भने ऋग्वेदमा सूर्यलाई नै सबै देवताको स्रोत मानिएको छ । छठ पर्वमा सूर्यलाई ‘छठिमाइ’ का रूपमा पूजा गर्ने चलन छ, जसलाई वैदिक अनुष्ठानमा तान्त्रिक अनुष्ठानको सम्मिश्रण मानिएको छ । यस पर्वको सम्पादन षष्ठी तिथिमा हुने भएकाले यसको तद्भव रूप छठले ‘परमेश्वरी’ को रूप लोकमानसमा ठाउँ पाएको हुनसक्ने विश्वास पाइन्छ ।
छठ पर्वमा अघ्र्य दिइने सामग्रीमा बाँसले वंशवृद्धि, उखुले आरोग्य, ठकुवाले समृद्धि, मौसमी फलफूल प्रकृतिप्रति कृतज्ञता र केरामा भगवान् विष्णुको बास रहेको मान्यताले ईश्वरीय सत्ताको दृष्टिमा सबै समान हुन् भन्ने सन्देश पनि दिन्छ ।
विशिष्ठ व्यक्तिद्वारा छठ पूजा
राष्ट्रपति विद्यादेवी भण्डारी, उपराष्ट्रपति नन्दबहादुर पुन र प्रधानमन्त्री पुष्पकमल दाहालले राजधानीका विभिन्न स्थानमा छठ पूजाका लागि सजाइएका नदी र तलाउमा पुगेर पूजाअर्चना गर्नुभयो ।
राष्ट्रपति भण्डारीले आज गौरीघाटस्थित वाग्मती नदी र कमलपोखरीमा पुगी त्यहाँ स्थापना गरिएको छठको प्रतीमामा पूजा गर्नुका साथै प्रसाद ग्रहण गर्नुभयो । त्यस्तै उपराष्ट्रपति पुनले पनि सूर्यको आराधना गरी मनाइने यस पर्वका अवसरमा आजै कमलपोखरी पुगी छठको प्रतीमा र तलाउमा पूजाअर्चना गर्नुभयो ।
केही वर्षदेखि राजधानीका विभिन्न स्थानका नदी र तलाउमा दुलही झंै सिङ्गारी छठ हर्षोल्लासपूर्वक मनाउने क्रम बढ्दै गएको छ । यस वर्ष पनि श्रद्धालुले पूजा सामग्री र घरमा बनाइएको विशेष पकवान अस्ताउन लागेको सूर्यलाई अर्घ दिई पूजापाठ गरेका छन् ।
आजै प्रधानमन्त्री दाहालले गौरीघाटस्थित वाग्मती नदी, रानीपोखरी र कमलपोखरीमा पुगी निर्माण गरिएको छठको प्रतीमामा पूजा गर्नुका साथै प्रसाद ग्रहण गर्नुभयो । आस्थाको पर्व छठअन्तर्गत आज तेस्रो दिन राजधानीका विभिन्न स्थानमा हजारौँ व्रतालुले अस्ताउँदो सूर्यलाई अर्र्र्घ अर्पण गरी पूजाअर्चना गरेका छन् ।
यस पर्वमा भुसवा र कृषिजन्य अन्नको पीठोबाट बनाइएका पकवानसँगै केराको घरी, माटोको हात्ती, सुप, कनसुपती, कलशसहितको घैँटो आदि सामग्रीको स्वच्छता र पवित्रतापूर्वक व्यवस्था गरिन्छ र साँझतिर अस्ताउने सूर्यको नमन गर्दै अर्घ दिइन्छ ।
तलाउ कुण्डमा सरसफाइ गरी बत्तीको झिलीमिली गर्नुका साथै विभिन्न सांस्कृतिक कार्यक्रम पनि गरिएको छ । सन्तान प्राप्ति, निरोगिता, सुख, समृद्धि र चर्मरोग निको हुने जनविश्वास अनुरूप पारस्परिक आत्मीयता र सद्भावको प्रतीकको रुपमा यो पर्व मनाइन्छ । रासस