‘हिमालयन ह्वाइट वाटर च्यालेन्ज’ मङ्सिर तेस्रो हप्ता
काठमाडौँ, ६ मङ्सिर । नेपाल एसोसिएसन अफ ¥याफ्टिङ एजेन्सिज (नारा)ले १५औँ ‘हिमालयन ह्वाइट वाटर च्यालेन्ज’ प्रतियोगिता यही मङ्सिर १३ देखि १५ गतेसम्म पोखरामा गर्ने भएको छ ।
कास्कीको उपल्लो सेती नदीमा प्रतियोगिता सञ्चालन हुने यहाँ आज आयोजित पत्रकार सम्मेलनमा जानकारी दिइएको छ । विगतका वर्ष झैँ यस वर्ष पनि महिला र पुरुष गरी तीन विधाका खेल एक्स्ट्रम स्लालम, बोटर क्रस र डाउन रिभर रेस्ट हुने छ । पल्लो सेतीको पाँच किमी दूरीमा हुने प्रतियोगितामा अनुमानित १५० स्वदेशी तथा विदेशीको सहभागिता हुने नाराका महासचिव शेखरबहादुर थापाले बताउनुभयो ।
पुरुषको प्रतियोगिताका प्रथमलाई ५००, द्वितीयलाई ३०० र तृतीयलाई २०० अमेरिकी डलर तथा महिला प्रतियोगीलाई क्रमशः ३००, २०० र १०० अमेरिकी डलर प्रदान गरिने आयोजकले जनाएको छ । विगतमा त्रिशूली र भोटेकोसी नदीमा गरिँदै आएको प्रतियोगिता यस पटक पोखरा आसपासमा गर्न लागिएको हो । यसले आन्तरिक तथा बाह्य पर्यटन प्रवद्र्धनका साथै घुमफिर वर्षलाई पनि सहयोग पुग्ने नाराको विश्वास छ ।
प्रतियोगितामा विभिन्न सामाजिक संस्थाको सहकार्यमा प्राथमिक उपचार, प्राविधिक तथा अन्य आवश्यक सहयोग रहने बताइएको छ । प्रतियोगिता सन् १९९० देखि गरिँदै आएको र सन् २००२ देखि नाराले मुख्य आयोजकका रुपमा सञ्चालन गर्दै आइरहेको छ । प्रतियोगिताको मुख्य प्रवद्र्धकका रुपमा नेपाल पर्यटन बोर्ड रहेको छ । रासस