संविधान संशोधन, पहाड र तराईलाई अलग गर्ने षड्यन्त्र हो : ओली; गोविन्द गौतमका परिवारलाई रु पाँच लाख सम्मानस्वरुप प्रदान
धनगढी, ३ चैत । नेकपा (एमाले)का अध्यक्ष केपी शर्मा ओलीले संविधान संशोधनका विषय पहाड र तराईलाई छुट्याउने षड्यन्त्रको शृङ्खला भएको बताउनुभएको छ ।
एमाले मेची–महाकाली राष्ट्रिय अभियानका क्रममा यहाँ आज भएको सभालाई सम्बोधन गर्दै नेता ओलीले संविधान संशोधन नभइकन निर्वाचन हुन सक्दैन भनी संविधान संशोधनको नाटक रचिएको आरोप लगाउनुभयो । उहाँले भन्नुभयो, “निर्वाचन र संविधान संशोधनको कतै कुनै साइनो छैन, निर्वाचन गर्ने कुरासँग संशोधनको कुनै सम्बन्ध छैन ।”
नेपाली परनिर्भर नभई आत्मनिर्भर र स्वतन्त्र भई देशलाई समृद्धिको बाटामा डो¥याउनुपर्नेमा जोड दिँदै पूर्वप्रधानमन्त्री ओलीले देशलाई फेरि पनि गरिबै राख्ने, अगाडि बढ्न नदिने, सम्पन्न हुन नदिने प्रयास निर्देशित रुपमा भइरहेको विचार व्यक्त गर्नुभयो ।
उहाँले देशमा शान्ति छाउन नदिने, संविधान बन्न नदिने, संविधान बनेपछि कार्यान्वयन हुन नदिने प्रयास भइरहेको जनाउँदै उहाँले चिन्ता व्यक्त गर्नुभयो । राष्ट्रिय एकता र समाजिक सद्भाव खलबलिन नदिन सबै चनाखो हुनुपर्नेमा पनि उहाँले जोड दिनुभयो ।
सभामा एमालेका उपाध्यक्ष वामदेव गौतमले सप्तरी जिल्लामा हत्याकाण्ड गराएर एमालेलाई बद्नाम गर्न चाहनहरु आफैँ बदनाम भएको बताउनुभयो । एमालेका अर्का उपाध्यक्ष भीमबहादुर रावलले तराई, पहाड र हिमालका जनताले एकता चाहेको उल्लेख गर्दै ‘जनतालाई टुटाउने र विभाजित गरेर बाह्य हस्तक्षेप निम्त्याउने षड्यन्त्र’ देशमा सफल हुन नदिइने बताउनुभयो । “एमालेले भारत, चीन, अमेरिका सबै देशसँग राम्रो सम्बन्ध चाहेको छ तर नेपालको स्वाधीनतालाई झुकाउने, बाह्य हस्तक्षेप निम्त्याउने कुरालाई अस्वीकार गर्छ, ” उहाँले भन्नुभयो । सभामा एमालेका नेता कर्ण थापा, प्रेम आले मगर, गरिमा शाह, नारदमुनि रानालगायतले पनि बोल्नुभएको थियो ।
सभामा नेकपा (माओवादी केन्द्र) डोटीका डम्बरबहादुर सिंहलगायत व्यक्ति एमालेमा प्रवेश गर्नुभएको थियो । स्थानीय बजारको मुख्य सडकको चोकमा एमालेले सभा गरेका कारण झन्डै तीन घन्टासम्म आवागमन अवरुद्ध भई सर्वसाधारण सास्ती खेप्न बाध्य भएका थिए । गत फागुन २१ देखि पूर्वी नेपालबाट सुरु गरिएको सो अभियान आजै कञ्चनपुरमा पुगेर औपचारिक रुपमा समापन गर्न लागिएको जनाइएको छ ।
संविधान कार्यान्वयन हुन नदिने षड्यन्त्र हुँदैछ : ओली
यसैबीच, नेकपा (एमाले) का अध्यक्ष केपी शर्मा ओलीले संविधान कार्यान्वयन हुन नदिने षड्यन्त्र भइरहेको बताउनुभएको छ ।
एमालेले आयोजना गरेको मेची–महाकाली राष्ट्रिय अभियानको आज कञ्चनपुरको भीमदत्तनगरमा समापन गर्दै नेता ओलीले कुनै पनि बहानामा आगामी वैशाख ३१ गते स्थानीय तहको निर्वाचन गर्नुपर्नेमा जोड दिनुभयो । राष्ट्रिय एकता र विकासका लागि एमालेको नेतृत्व आवश्यक रहेको धारणा राख्दै अध्यक्ष ओलीले सङ्क्रमणकाल टुङ्गिन नदिन र विभिन्न जातीय, वर्गीय नाउँमा वैमनश्यता फैलाउन तत्वसमेत सक्रिय रहेको बताउनुभयो ।
पूर्वप्रधानमन्त्री ओलीले सिमानामा भारतीयले हेपाहा प्रवृत्ति देखाएको आरोप लगाउँदै भन्नुभयो, “गोविन्द गौतमको हत्याको विषयमा भारतले माफी माग्नुपर्छ ।”
नेता माधवकुमार नेपालले तीन वटै तहको निर्वाचन नभए संवैधानिक सङ्कट आउने बताउनुभयो । निर्वाचन हारजितको विषय नौलो होइन भन्दै उहाँले लामो समयदेखि निर्वाचन नहुँदा विकास निर्माण प्रभावित हुनाका साथै स्थानीय निकाय जनप्रतिनिधिविहीन बनेको बताउनुभयो । भारतीय एसएसबीले गौतमको हत्या गरेको विषयमा सरकारले कूटनीतिक पहल नगरेको आरोप पनि उहाँले लगाउनुभयो । ‘
महासचिव ईश्वर पोखरेलले संविधान संशोधन आवश्यक नरहेको धारणा राख्नुभयो । संविधान संशोधन गरेर कसको सेवा गर्न खोजिएको हो भन्ने प्रश्न गर्दै उहाँले भन्नुभयो, “यसको जवाफ सत्तारुढ नेपाली कांँग्रेस र नेकपा(माओवादी केन्द्र)ले दिनुपर्छ ।” संविधान कार्यान्वयन र निर्वाचन गर्न नदिन षड्यन्त्र भइरहेको जनाउँदै नेता पोखरेलले त्यसको खबरदारी एमालेले गर्ने बताउनुभयो ।
कार्यक्रममा एक साताअघि भारतीय सीमा सुरक्षा बल(एसएसबी) को गोली प्रहारबाट सहादत प्राप्त गर्नुभएका कञ्चनपुर पुनर्वासका गोविन्द गौतमका परिवारलाई एमालेले रु पाँच लाख सम्मानस्वरुप प्रदान गरेको छ ।
सम्बोधनका क्रममा सहिद गौतमको सम्मानस्वरुप नेता ओलीले रु पाँच लाखको चेक र गौतमका छोरीलाई एक थान ल्यापटपसमेत प्रदान गर्नुभयो । उक्त चेक र ल्यापटप एमाले जिल्ला अध्यक्ष तथा पुनर्वासका बासिन्दा तारा लामा तामाङलाई हस्तान्तरण गरिएको थियो ।रासस