प्राविधिक नहुँदा मेसिन थन्कियो
काठमाडौँ, २२ चैत । त्रिभुवन विश्वविद्यालय केन्द्रीय पुस्तकालयस्थित रु दुई करोड मूल्य बराबरको ‘माइक्रोफिल्म मेसिन’ प्राविधिकको अभावमा थन्किएको छ ।
पुस्तकालयका पुराना पुस्तक, हस्तलिखित ग्रन्थ, समाचारपत्रलाई रिलमार्फत खिचेर सुरक्षित राख्नका लागि जापान सरकारबाट प्राप्त माइक्रोफिल्म प्राविधिक नहुँदा थन्किएको हो ।
पुस्तकालयका सह–पुस्तकालय अध्यक्ष पूर्णलाल श्रेष्ठले माइक्रोफिल्म चलाउन जान्ने प्राविधिक नहुँदा छ वर्षदेखि त्यत्तिकै थन्किएको बताउनुभयो । मेसिन चलाउन नजान्ने भएपछि मेसिनमा प्रयोग हुने रिल, केमिकल र मसी पनि त्यत्तिकै रहेको छ । सुरुमा जापानले मेसिन चलाउन पुस्तकालयकै एकजना कर्मचारीलाई सिकाए पनि पछि मेसिनमा सानो प्राविधिक समस्या आएपछि मेसिन त्यत्तिकै थन्किएको उहाँले बताउनुभयो । “पहिले २० दिनको तालिममा एकजना कर्मचारीले मेसिन चलाउन जान्नु भएको थियो”, उहाँले भन्नुभयो – ‘‘मेसिन राम्रै अवस्थामा छ । तर सानो प्राविधिक समस्या आएपछि ती कर्मचारीले चलाउन जान्नुभएन, त्यसैले अहिले मेसिन त्यत्तिकै थन्किएको छ ।”
उहाँकाअनुसार चार वर्षसम्म ती कर्मचारीले जेनतेन मेसिन चलाएर २५ हजार पुराना हस्तलिखित ग्रन्थ, पुस्तक, समाचारपत्र रिलमा राखिएका छन् । एक रिलमा २५ पुस्तकका पाना अटाउने गर्छन् । सन् २००५ मा जापान सरकारले पुस्तकालयका पुस्तकलाई रिलमार्फत खिचेर सुरक्षित राख्नका लागि माइक्रोफिल्म दिएको थियो । जापान सरकारलाई प्राविधिक उपलब्ध गराउन पटक पटक आग्रह गरे पनि बेवास्ता गरेको उहाँले जानकारी गराउनुभयो । पुस्तकालयमा रहेका सबै पुस्तकमा भएका कुरालाई सुरक्षित राख्नका लागि छुट्टै ‘माइक्रोफिल्म शाखा’ समेत स्थापना गरेको थियो । तर मेसिन नचल्दा अहिले उक्त शाखा बन्द गरिएको छ । मेसिन नचलेपछि सुरक्षित रुपमा नयाँ भवनमा राखिएको छ । रासस