३४ जिल्लाको मत परिणाम: कांग्रेस, एमालेको शतक, माओवादीको ४५
काठमाडौं: पहिलो चरणको स्थानीय तह निर्वाचनमा प्रमुख दल नेपाली काँग्रेस र एमालेले सय बढी स्थानीय तहमा विजयी भएका छन्। तीन प्रदेशका ३४ जिल्लाका २५९ स्थानीय तहमा मतपरिणाम सार्वजनिक भइसकेको छ।
नेकपा एमाले १ सय ६, कांग्रेस सय र माओवादी ४६ स्थानमा विजयी भएको छ। एमालेले प्रदेश नं ६ मा ९ नगरपालिका र १२ गाउँपालिकासहित २१ स्थानीय तहमा जितेको छ । काँग्रेसले एमालेलाई पछ्याउँदै प्रदेश ६मा ७ नगरपालिका र १३ गाउँपालिकासहित २० स्थानीय तहमा विजय भएको। यस्तै प्रदेश नम्बर ६ मा माओवादीको १६ ठाउँमा विजय हाँसिल गरेको छ भने दुई स्वतन्त्र उम्मेदवार विजयी भएका छन् ।
प्रदेश नम्बर ४ मा एमाले ९ नगरपालिका र २२ गाउँपालिकासहित ३१, नेपाली काँग्रेसले १३ नगरपालिका र २५ गाउँपालिकासहित ३८, माओवादी ५ गाउँपालिका, स्वतन्त्र १ गाउँपालिका र राष्ट्रिय जनमोर्चाका एक जना उम्मेदवार गाउँपालिकामा विजयी भएका छन्।
प्रदेश नं ३ मा एमालेले ४८ स्थानीय तहमा जितेको छ भने कांग्रेसले ३२ स्थानीय तहमा विजयी भएको छ। नेकपा माओवादीले १६ स्थानमा मात्र जित निकालेको छ। हेटौडा उपमहानगरपालिका र चार महानगरपालिका (काठमाडौं, ललितपुर, भरतपुर र पोखराको लेखनाथ)सहित केही स्थानको मतपरिणाम आउन बाँकी छ।