पेट्रोल, डिजेल, मट्टितेल र ग्यासको मूल्य घट्यो
July 2, 2017 | 9:38 pm
काठमाडौँ, असार १८ गते। नेपाल आयल निगमले आज (आइतबार) रातिबाट लागू हुने गरी पेट्रोलियम पदार्थको मूल्य घटाएको छ ।
निगम प्रवक्ता सिताराम पोख्रेलका अनुसार पेट्रोल, डिजेल र मट्टितेलको मूल्य समान २ रुपैयाँ प्रतिलिटर घटाइएको छ । हवाइ इन्धन प्रतिलिटर ४ रुपैयाँ र खाना पकाउने एलपी ग्यासको मूल्य २५ रुपैयाँ प्रतिसिलिन्डर घटाइएको छ ।
मूल्य घटेपछि सोमबार बिहानबाट प्रतिलिटर पेट्रोल ९८ रुपैयाँ, डिजेल तथा मट्टितेल ७४ रुपैयाँमा उपभोक्ताले खरिद गर्न पाउनेछन् । हवाइ इन्धन ८२ रुपैयाँ प्रतिलिटर र खाना पकाउने ग्यास एक हजार तीन सय ५० रुपैयाँ प्रतिसिलिन्डरमा उपलब्ध हुनेछ ।
पेट्रोलियमको मूल्य घटाएपछि पनि आयल निगमलाई आगामी १५ दिनमा ४० करोड रुपैयाँ मुनाफा हुनेछ ।