३३ जिल्लाको समन्वय समिति गठन गर्न आयोगको निर्देशन
काठमाडौँ, साउन ४ गते । निर्वाचन आयोगले रुकुम र नवलपरासी बाहेकका जिल्लामा ‘जिल्ला समन्वय समिति गठन गर्न निर्देशन दिएको छ । आज बसेको आयोगको बैठकले दोस्रो चरणमा सम्पन्न भएको ३५ जिल्ला मध्ये ३३ जिल्लाको समन्वय समिति गठन गर्न निर्देशन दिएको आयोगका प्रवक्ता सूयप्रसाद शर्माले विज्ञप्ती मार्फत जानकारी गराए ।
उनीद्धारा जारी विज्ञप्तीमा भनिएको छ,‘दाेस्राे चरणमा गाउँपालिका/नगरपालिकाको निर्वाचन सम्पन्न भएका प्रदेश नम्बर १, ५ र ७ का नवलपरासी र रुकुम बाहेकका ३३ जिल्लाको जिल्ला समन्वय समितिको निर्वाचन सञ्चालन गर्नको लागि हाल नियुक्त भइरहेका सम्बन्धित जिल्लाका मुख्य निर्वाचन अधिकृतहरूलाई जिम्मेवारी तोक्ने निर्णय गरेको छ ।’
आयोगले सम्बन्धित जिल्लाको जिल्ला सभाबाट जिल्ला समन्वय समितिमा रहने सदस्य संख्या यकीन भएपछि मात्रै निर्वाचनको कार्यक्रम सञ्चालन गर्न सम्बन्धित मुख्य निर्वाचन अधिकृतलाई निर्देशन दिइएको छ । रुकुम र नवलपरासीका अधा-आधा भूभाग फरक-फरक प्रदेशमा परेकाले जिल्ला समन्वय समिति गठन गर्न अप्ठ्यारो भएको हो ।