आजदेखि क्युरिटी इम्बोसड नम्बर प्लेट लागु
काठमाडौँ, भदौ ५ गते । सवारीसाधनको व्यवस्थापनलाई सहज बनाउने उद्देश्यले यातायात ब्यवस्था विभागले आजदेखि क्युरिटी इम्बोसड नम्बर प्लेट सुरु गरेको छ ।
मुलुकमा पहिलोपटक प्रयोगमा ल्याएको सो प्रविधिबाट सवारीसाधन र सवारी धनीको विवरणका साथै राजश्व असुलीको अवस्थाका बारेमा तत्काल जानकारी लिई सवारीसँग सम्बन्धित अपराध नियन्त्रण गर्न सकिने छ ।
यातायात व्यवस्था विभागले अमेरिका र बंगलादेशको संयुक्त डेटाटोर टाइगर आइटी कम्पनीलाई ठेक्का दिइएको र आगामी पाँच वर्षभित्र २५ लाख सवारीसाधन सो प्रणालीमा व्यवस्थित गर्ने सहमति सन् २०१६ मा भइसकेको छ । सवारीसाधनमा इम्बोसड नम्बर प्लेटमा ९९ प्रतिशत एल्मुनियम तथा विद्युतीय चिप्स राखिने छ ।
प्लेटमा अन्तराष्ट्रिय मापदण्डका सूचकांकसमेत प्रयोग गरिने हुँदा यो भरपर्दो र पारदर्शी रहने दावी बिभागको छ । प्लेटको कडापन एच ४१ र एच ४२ हुने र प्लेटको मोटाई शुन्य दशमलब ९८ एमएम हुनेछ । राष्ट्रपतिको सवारीसाधनमा नेपाली झण्डा, झण्डामुनि माथिबाट हल्का निलो रङ, तल गाढा निलो रङ एनइपी, अक्षरमुनि लालीगुराँससहित नेपालको निसाना छाप हुनेछ । सरकारी सवारीमा सेतो प्लेटमा रातो अक्षर, सार्वजनिक सवारीमा पहेँलो प्लेटमा कालो अक्षर,
निजी सवारीमा सेतो प्लेटमा कालो अक्षर तथा कूटनीतिक सवारीमा सेतो प्लेटमा निलो अक्षर रहने कानूनी व्यवस्था गरिएको छ । नेपालमा हाल प्रयोग भइरहेका विभिन्न २३ प्रकारका नम्बर प्लेटलाई अब पाँच प्रकारको प्लेटमा सीमित गर्ने व्यवस्था मिलाइएको छ । सवारीसाधनमा इम्बोसड नम्बर प्लेट राखेपछि सवारी चोरी हुने समस्या र अपराधका काममा प्रयोग हुने घटना पूर्णरुपमा नियन्त्रण हुने विभागका महानिर्देशक रुपनारायण भट्टराईले विश्वास व्यक्त गर्नुभयो । प्रणालीको शुभारम्भ गर्दै भौतिक पूर्वाधार तथा यातायात मन्त्री वीरबहादुर बलायरले यातायात क्षेत्रमा सो प्रविधिको प्रयोगले नयाँ आयाम थपेकाले अब अन्तराष्ट्रिय मापदण्डमा यातायातको व्यवस्थापन तथा विकास गर्न सकिने विश्वास व्यक्त गर्नुभयो । प्लेटको बायाँ छेउँको माथि नेपालको झण्डा र त्यसको तल देश जनाउने गरी एनइपी र लेखिएको छ, त्यसको मुनि सुरक्षात्मक होलोग्राम राखिएको छ । प्लेटको माथि अञ्चल तथा तल लट नम्बर जनाउने गरी अंग्रेजी अल्फाबेटमा लेखिएको छ । यो संघीयताको अभ्यास सुरु भएपछि सोहीअनुरुप विकास गर्न सकिने विभागको भनाई छ ।