बौद्ध विश्वविद्यालयले नयाँ शैक्षिक कार्यक्रम सञ्चालन गर्ने
बुटवल, भदौ २७ गते । लुम्बिनी बौद्ध विश्वविद्यालयले यसै शैक्षिक सत्रदेखि बुटवलमा स्नातक तहको नयाँ शैक्षिक कार्यक्रम सञ्चालन गर्ने भएको छ ।
बुटवलमा यसै शैक्षिक सत्रदेखि स्नातक तहमा बुद्धिज्म, ट्राभल एण्ड टुरिजम म्यानेजमेन्ट (बिबिटिटिएम) को कक्षा सञ्चालन गर्ने भएको हो ।
जुनसुकै संकायबाट कक्षा १२ पास गरेका विद्यार्थीले यो विषय अध्ययन गर्न पाउने विश्वविद्यालयका कार्यकारी समिति सदस्य तथा निवर्तमान क्याम्पस प्रमुख इन्द्र काफ्लेले जानकारी दिनुभयो ।
कक्षा १२ मा कम्तीमा ४५ प्रतिशत अंक प्राप्त गरेका विद्यार्थीलाई भर्ना गरिने विश्वविद्यालयले जनाएको छ । होटल म्यानेजमेन्ट, इभेन्ट म्यानेज, टुरगाइड, एयर टिकेटर, पर्यटन म्यानेजर बन्न चाहने विद्यार्थीको लागि यो महत्वपूर्ण सावित हुने विश्वविद्यालयले जनाएको छ ।
पहिलो वर्ष ४० विद्यार्थीलाई मात्रै भर्ना गरिने काफ्लेले बताउनुभयो । विश्वविद्यालय अनुदान आयोगको सहयोग रहेकाले विश्वविद्यालयले सस्तो शुल्कमै यो पाठ्यक्रम अध्यापन गराउने छ । अंग्रेजी माध्ययमा सञ्चालन हुने यो कार्यक्रममा ऐच्छिक विषयका रुपमा चिनियाँ भाषासमेत पढ्न पाइनेछ ।
लुम्बिनी क्षेत्र र अन्तर्राष्ट्रिय विमानस्थल निर्माण हुँदै गरेकाले यो विषयको अध्यापन शुरुवातलाई महत्वपूर्ण मानिएको छ । हाल अध्ययन गरेका टुरगाइड हुँदा नेपालमा पर्यटन प्रवद्र्धन हुन सकेको छैन् ।
उपप्राध्यापकसमेत रहेका काफ्लेले बौद्ध स्मारकहरुलाई पर्यटनको महत्वपूर्ण क्षेत्र मानिएकाले त्यस सम्बन्धित जनशक्ति आवश्यक भएको भन्दै विश्वविद्यालयले नयाँ पाठ्यक्रम ल्याएको बताउनुभयो ।
कक्षा १२ पास गरेर बसेका विद्यार्थीले सम्पूर्ण म्यानेजमेन्टको कक्षा यो कोर्षबाट पाउने काफ्लेले बताउनुभयो । विश्वविद्यालयले तिहारपछि कक्षा सञ्चालन गर्ने गरी भर्ना लिने तयारी गरेको छ । रासस