जीर्ण जनकपुरको व्यवस्थापन गर्छौं – नगरप्रमुख साह
जनकपुरधाम,असोज ९ गते । जनकपुर उपमहानगरपालिकाका नगर प्रमुख लालकिशोर साहले उपमहानगरपालिकाको सबैभन्दा प्रमुख कार्य जीर्ण जनकपुरको व्यवस्थापन भएको बताउनुभएको छ ।
मुख्य निर्वाचन अधिकृतको कार्यालयद्वारा आज जनकपुरधाममा आयोजित शपथ ग्रहण समारोहमा बोल्दै उहाँले जनकपुरको गरिमालाई जोगाइराख्ने कार्यमा सबैको सहयोगको खाँचो औँल्याउनुभयो । निर्वाचनका क्रममा दलहरूबीच प्रतिस्पर्धा रहेकामा अब त्यस्तो प्रतिस्पर्धा सकारात्मक कामका लागि हुनुपर्ने उहाँको धारणा थियो ।
मिथिला संस्कृतिको जगेर्ना र सामाजिक एकताका लागि ऐक्यबद्धताको आवश्यकता रहेको पनि उहाँले बताउनुभयो ।
उपप्रमुख रीता झाले जनकपुरको सट्टा जनकपुरधाम प्रचलनमा ल्याउन र धार्मिक वातावरण निर्माण गर्न सबै पक्षको सहयोग जरुरी भएको धारणा राख्नुभयो ।
मुख्य निर्वाचन अधिकृत राधाकृष्ण उप्रेतीले जनप्रतिनिधिहरूले अव्यवस्थित जनकपुरलाई व्यवस्थित गर्ने र धार्मिक सौम्यता कायम राख्ने कार्यलाई प्राथमिकता दिने विश्वास व्यक्त गर्नुभयो ।