निर्वाचनमा खेलकुद पदाधिकारीदेखि ओलम्पियनसम्म

Electionमुना कार्की / काठमाडौँ, कात्तिक ३० गते । आगामी मंसिर १० र २१ गते हुने प्रतिनिधिसभा र प्रदेशसभाको निर्वाचन प्रतिस्पर्धाका लागि खेलकुद पदाधिकारी, ओलम्पियन र खेलाडीसम्मका व्यक्तित्वले उम्मेदवारी दिनुभएको छ ।

खेलकुद क्षेत्रबाट प्रतिनिधिसभाको चुनावमा उठ्ने मध्येका एक हुनुहुन्छ, युवा तथा खेलकुदमन्त्री राजेन्द्र केसी । उहाँ काठमाडौँ क्षेत्र नं १० बाट नेपाली काँग्रेसका तर्फबाट प्रतिनिधिसभाको उम्मेदवार हुनुहुन्छ ।

विसं २०७० मा सम्पन्न संविधानसभाको दोस्रो निर्वाचनमा उहाँले माओवादी केन्द्रका अध्यक्ष पुष्पकमल दाहाल ‘प्रचण्ड’लाई हराउनुभएको सन्दर्भले निकै चर्चा बटुलेको थियो । अहिले केसीको प्रतिस्पर्धी वाम गठबन्धनबाट माओवादी केन्द्रका हितमान शाक्य हुनुहुन्छ ।

“राष्ट्र निर्माण र खेलकुद क्षेत्रको विकासका लागि सदैव समर्पित भएर लाग्छु,” उहाँले भन्नुभयो ।

त्यस्तै, नेपाल ओलम्पिक कमिटी (एनओसी)का अध्यक्ष जीवनराम श्रेष्ठ वाम गठबन्धनबाट काठमाडौँ क्षेत्र नं ८ मा प्रतिनिधिसभाको उम्मेदवार हुनुहुन्छ । विद्यार्थीकालदेखि नै राजनीतिमा लाग्नुभएका श्रेष्ठले पार्टीभित्र वडा, नगर, इलाका, जिल्ला र उपत्यका कमिटीको नेतृत्व सम्हाल्नुका साथै विसं २०५३ र २०६३ गरी दुईपटक राष्ट्रिय खेलकुद परिषद् (राखेप) को सदस्य–सचिवमा नियुक्त हुनुभएको थियो ।

उक्त क्षेत्रमा उहाँको मुख्य प्रतिस्पर्धि काँग्रेस नेता नवीन्द्रराज जोशी हुनुहुन्छ ।

राष्ट्रिय खेलकुद परिषद् (राखेप)का कोषाध्यक्ष सुरेन्द्र हमाल काँग्रेसको तर्फबाट बाँके क्षेत्र नं २ को प्रदेशसभा (ख) बाट उम्मेदवार बन्नुभएको छ । विसं २०३५ देखि विद्यार्थी आन्दोलनबाट आफ्नो राजनीतिक यात्रा शुरु गर्नुभएको हमाल विसं २०४९ को स्थानीय निर्वाचनमा नेपालगन्ज नगरपालिकाको उपप्रमुख पदमा निर्वाचित हुनुभएको थियो । सन् १९८४ मा अमेरिकाको लसएन्जल्समा सम्पन्न ओलम्पिकको २३औँ संस्करणमा हमालले नेपालका तर्फबाट सहभागिता जनाउनुभएको थियो ।

त्यसैगरी, सन् १९८३ मा सिरियामा भएको एशियन भारोत्तोलन च्याम्पियनसिपमा उहाँले नेपाललाई काँस्य पदक दिलाउनुभयो । हमालले दक्षिण एशियाली खेलकुद (साग)को पहिलो र दोस्रो संस्करणमा रजतपदकसमेत हात पार्नुभएको थियो ।

“खेल क्षेत्र बुझेको व्यक्तिले नै खेल र खेलाडीका लागि केही गर्न सक्छ भन्ने उद्देश्यले उम्मेदवारी दिएको हुँ,” उहाँले भन्नुभयो ।

हमालले मुलुकलाई चिनाउने सबैभन्दा उपयुक्त माध्यम खेलकुद भएकाले पनि यसको स्तरोन्नतिमा आफू सदैव लागिरहने प्रतिबद्वता व्यक्त गर्नुभयो । हमालको चुनावी प्रतिस्पर्धी एमालेका विजयकुमार गुप्ता, संघीय फोरमका दुर्गेसकुमार वैश्य र राष्ट्रिय जनता पार्टीका कैलाशकुमार मिश्र हुनुहुन्छ ।

काँग्रेसले काठमाडौँ क्षेत्र नं ९ प्रदेशसभा (क) बाट अखिल नेपाल फुटबल संघ (एन्फा)का प्रमुख कार्यकारी अधिकृत (सिइओ) इन्द्रमान तुलाधरलाई उम्मेदवार बनाएको छ । तुलाधर सबैभन्दा पुरानो क्लब ‘ए’ डिभिजनमा रहेको संकटा क्लबको अध्यक्षका साथै तेक्वान्दो खेलको प्रशिक्षकसमेत हुनुहुन्छ । तुलाधरले खेलकुदको विकासमा आफ्नो ध्यान केन्द्रित रहने बताउनुभयो ।

उहाँले खेलकै कारणले आफू राजनीतिमा लागेको भन्दै भौतिक पूर्वधारको कमी रहेकाले यसको निर्माणतर्फ विशेष ध्यान दिने बताउनुभयो । तुलाधरको मुख्य प्रतिस्पर्धा वाम गठबन्धनका उम्मेदवार अजयक्रान्ति शाक्यसँग हुने अनुमान गरिएको छ ।

राष्ट्रिय खेलकूद परिषद् (राखेप)का पूर्वसदस्यसचिव केशव स्थापित वाम गठबन्धनबाट काठमाडौँ क्षेत्र नं ६ प्रदेशसभा (क) को उम्मेदवार हुनुहुन्छ । स्थापित विसं २०५१ मा राष्ट्रिय खेलकुद परिषद्को सदस्य–सचिवसमेत रहिसक्नुभएको छ । उहाँ काठमाडौँ महानगरपालिकाको पूर्वप्रमुख पनि हुनुहुन्छ ।

“राष्ट्र निर्माणका साथै खेल क्षेत्रको विकास गर्ने ठूलो सपना छ,” उहाँले भन्नुभयो ।

नेपाल क्रिकेट संघ (क्यान)का पूर्वअध्यक्ष टंक आङबुहाङ ताप्लेजुङ प्रदेशसभा ‘ख’बाट वाम गठबन्धनको उम्मेदवार बन्नुभएको छ । उहाँ यसअघि सम्पन्न दुवै संविधानसभा चुनावमा ताप्लेजुङबाट पराजित हुनुभएको थियो ।

त्यसैगरी, एन्फाका पूर्वमहासचिव कुमारजंग थापा काँग्रेसबाट सुनसरी क्षेत्र नं ३ को प्रदेशसभा (क) बाट उम्मेदवार हुनुहुन्छ भने एन्फाकै केन्द्रीय सदस्य महमद समिउल्लाह बारा क्षेत्र नं ३ प्रदेशसभा (ख) मा एमालेको उम्मेदवार हुनुहुन्छ ।

यस्तै, एन्फा उपाध्यक्ष किशोर राई सुनसरी क्षेत्र नं १ प्रदेशसभा (क) बाट काँग्रेसका तर्फबाट चुनावी मैदानमा हुनुहुन्छ ।

यसैगरी, काँग्रेसले ललितपुर क्षेत्र नं १ प्रदेशसभा (ख)बाट कराँतेका मीनकृष्ण महर्जनलाई उम्मेदवार बनाएको छ भने नेपाल एथलेटिक्स संघका अध्यक्ष राजीवविक्रम शाह काँग्रेसको तर्फबाट जाजरकोटमा प्रतिनिधिसभा सदस्यको उम्मेदवारी बन्नुभएको छ । उहाँको प्रतिस्पर्धी माओवादी केन्द्रका नेता शक्ति बस्नेत हुनुहुन्छ ।

यस्तै, नेपाल भलिबल संघका पूर्वकोषाध्यक्ष बुद्धि कटुवाल सुनसरी क्षेत्र नं १ प्रदेशसभा (ख)बाट काँग्रेसको उम्मेदवार हुनुहुन्छ । नेपाल क्रिकेट संघ (क्यान)का पूर्व कार्यवाहक अध्यक्ष दीपक कोइराला वाम गठबन्धनका तर्फबाट कास्की क्षेत्र नं १ मा प्रदेशसभा (क) मा उम्मेदवार हुनुहुन्छ ।

Related News

Comments are closed

TOP NEWSview all

Japan Hands Over the Sanitary Napkin-Making Machine in Parsa

Mayor Shah directs employees to reduce visits, seminars

Veteran singer, musician Bhakta Raj Acharya passes away

Trade deficit of Rs 811 billion in first seven months

WHO congratulates Nepal for legislation to restrict trans-fatty acids in food




Positive Development Media Pvt. Ltd. / Regd. No: 232 / 073-74

Newbaneshwor
Kathmandu, Nepal

4479401


Editor : Mr. Divesh J.B. Rana

Chairperson : Mr. Kishore Thapa


Counter:
Web Counter