भवनको भव्यताले मात्र नागरिकको न्यायप्राप्ति पूरा हुदैन: महान्यायाधिवक्ता

नेपालगञ्ज । महान्यायाधिवक्ता अग्निप्रसाद खरेलले कार्यालय भवनको भव्यताले मात्र नागरिकको न्यायप्राप्तिको चाहना पूरा नहुने बताएका छन् ।

निर्माण भएको उच्च सरकारी वकिल कार्यालयको आज उद्घाटन गर्दै उनले कार्यालयबाट हुने सेवा प्रवाह निष्पक्ष र सहज बनाउनेतर्फ कर्मचारीको ध्यान जानुपर्नेमा जोड दिए ।

महान्यायाधिवक्ता खरेलले संविधान कार्यान्वयनको प्रक्रिया मुलुकभरि शुरु भइसकेको उल्लेख गर्दै संविधानले निर्दिष्ट गरेअनुसारका संरचना निर्माणको काम पनि अहिले द्रुतगतिमा अघि बढिरहेको छ भने ।

नायब महान्यायाधिवक्ता बद्रीप्रसाद गौतमको अध्यक्षतामा भएको सो कार्यक्रममा नेपाल बार एसोसिएसनका अध्यक्ष शेरबहादुर केसीले सरकारी वकिल र प्रहरीको समन्वयबाट मुद्दाको अभिभाजनलाई प्रभावकारी बनाउन सकिने भएकाले यस विषयमा गम्भीर हुनुपर्ने सुझाव दिएका थिए ।