फेवाताल अतिक्रमण गरी निर्माण गरिएका संरचना भत्काउन सर्वोच्चको आदेश
काठमाडौं, वैशाख १६, २०७५ सर्वोच्च अदालतले पोखराको फेवाताल अतिक्रमण गरेर निर्माण गरिएका भौतिक संरचना भत्काउन आदेश दिएको छ । अतिक्रमण गरेर निर्माण भएका टहरा भत्काउन न्यायाधीशद्धय ओमप्रकाश मिश्र र सपना मल्ल प्रधानको संयुक्त इजलासले आदेश दिएको हो । आदेशमा फेवाताल अतिक्रमण गरी निर्माण गरिएका टहरा गैरकानूनी भएको भन्दै भत्काउन भनिएको छ ।
अधिवक्ता खगेन्द्र सुवेदीले २०६८ असार २३ मा दायर गरेको रिटमा सर्वोच्चले यस्तो आदेश दिएको हो । फेवालतामा निर्माण भएका गैरकानूनी टहरा भत्काउन माग गर्दै २०६७ साल यता सार्वेच्चमा ४ वटा रिट दर्ता भएका थिए । सर्वोच्चले ती सबै रिट जारी गर्दै फेवाताल जस्तो प्रकृतिक सम्पदाको जग्गा व्यापारिक प्रयोजनमा प्रयोग गर्नु गैरकानूनी भएको ठहर समेत गरेको छ । यस्तै, सर्वोच्चले फेवातालको अतिक्रमण भएको जग्गा छानबिन गर्न विश्वप्रकाश लामिछानेको संयोजकत्वमा २०६९ सालमा गठित समितिको प्रतिवेदन कार्यान्वयन गर्न समेत भनेको छ ।