सरकार र डा. केसी पक्षबीच वार्ता असफल
काठमाडौँ, साउन ९ गते । चिकित्सा शिक्षा सुधारको माग राख्दै अनशनरत डा. गोविन्द केसीका प्रतिनिधि र सरकारी टोलीबीच आज भएको वार्ता निष्कर्षविहीन भएको छ । शिक्षा मन्त्रालयमा आज भएको वार्तामो माग सम्बोधनमा सरकारी पक्ष गम्भिर नदेखिएकाले वार्ता निष्कर्षविहीन भएको डा केसीका तर्फबाट वार्ता टोलीका संयोजक डा. अभिषेक राज सिंहले आरोप लगाउनुभयो ।
वार्तापछि विज्ञप्ति जारी गरी डा. सिंहले अनशनरत डा. केसीको स्वास्थ्य असाध्यै नाजुक भइसक्दा पनि सरकारी पक्ष चरम गैर जिम्मेवार र संवेदनविहीन हुँदै विधेयक सम्बन्धी दफागत छलफलमा सार्थक रुपमा प्रवेश नगरेको आरोप लगाउनुभयो । सरकारलाई उपलब्ध गराएको सूची बमोजिमको सुधारसहित विधेयक पारित गर्ने सरकारी प्रतिवद्धता आए मात्रै अर्को चरणको वार्तामा बस्ने केसी पक्षले जनाएको छ । सरकारले डा. केसीको ज्यान जोखिममा पार्ने तथा स्वास्थ्य र चिकित्सा शिक्षा क्षेत्र सुधारका काममा हलो अड्काउने रवैया अपनाएको भन्दै त्यसको कडा विरोध गर्ने विज्ञप्तिमा जनाइएको छ ।
त्यसअघि आजै बालुवाटारमा डा. केसीको माग सम्बन्धमा नेकपाका अध्यक्ष समेत रहेका प्रधानमन्त्री केपी शर्मा ओली, अर्का अध्यक्ष पुष्पकमल दाहाल, नेता सुवास नेम्वाङ र त्रिविका पूर्व उपकुलपति केदारभक्त माथेमाबीच छलफल भएको थियो । डा. केसीले संसद सचिवालयमा दर्ता भएको चिकित्सा शिक्षा विधेयकको २५ बुँदामा संशोधन गर्नुपर्ने बताएपछि ती बुँदामा छलफल भएको सिंहले बताउनुभयो ।