विदेशबाट फर्किएर सामूहिक भैँसीपालन
सुरेन्द्र खत्री / रुकुम (पश्चिम), साउन ११ गते । विदेश गएर फर्किएका रुकुम पश्चिम चौरजहारीका छजना युवाले सामूहिक भैँसीपालन व्यवसाय सञ्चालन गरेका छन् । अर्काको देशमा गएर पसिना बगाउनुभन्दा आफ्नै गाउँघरमा व्यवसाय गरेर आत्मनिर्भर बन्न सकिने भन्दै उनीहरू यसतर्फ आकर्षित भएका हुन् ।
चौरजहारी नगरपालिका –५ लहरेसिमलका २९ वर्षीय अमृत शर्माको नेतृत्वमा उनीहरूले लहरेसिमल दुग्ध उत्पादन भैँसी फर्म स्थापना गरी गत वैशाखदेखि काम थालेका छन् । व्यवसायमा संलग्न अन्य युवामा मुक्तिप्रसाद शर्मा, दीपेश ढकाल, दिनेश शर्मा, गोरख रावत र चन्द्रलाल शर्मा रहनुभएको छ । सबैजना ३० वर्ष मुनिका युवा रहेको फर्मका अध्यक्ष अमृत शर्माले बताउनुभयो । सुरुमा २८ लाख लगानीमा भैँसी गोठ निर्माण गरेको र त्यसमा अहिले १५ वटा भैँसी पालन गरिएको शर्माले जानकारी दिनुभयो । जसमा चारवटा दुहुना छन् । एक महिनाभित्र सबै भैँसी दुहुना हुने र बजारमा दूध निर्यात गरेर आम्दानी बढाउने बताइएको छ । गोठको सबै कामकाज आफूहरूले मिलेर गर्ने गरेको व्यवसायी गोरख रावतले बताउनुभयो ।
‘विदेशमा गर्ने दुःख नेपालमै गरौँ भनेर साथीभाइको सल्लाहले काम सुरु गरेका छौँ । ’ व्यवसायी शर्माले भन्नुभयो, ‘यसबाट उदाहरणीय काम गरेर विदेशिएका अरू दाजुभाइलाई पनि स्वदेशमै केही गर्न प्रेरणा दिन चाहन्छौँ । ’ विदेशमा आफूहरूले भोग्नुपरेका दुःख सम्झेर गाउँमै केही गछौँ भन्दै सहयोगका लागि नगरपालिकासँग अनुरोध गरेर केही सहयोगसमेत प्राप्त गरेको उहाँले सुनाउनुभयो । युवा उद्यमी विकास गरेकोप्रति खुसी भएर नगरपालिकाले १५ लाख रुपियाँ सहयोग प्राप्त गरेको उहाँको भनाइ थियो ।
चौरजहारी बजारमा डेरी स्थापना गरी आफ्नो फर्म र वडाका सबै किसानबाट दूध खरिद गरेर एकमुष्ट बिक्री गर्ने योजना रहेको उनीहरूले बताएका छन् । प्रत्येक घरमा दुईवटा भैँसीपालन गर्न लगाउने र उक्त दूध गाउँमै खरिद गरेर आफूले उत्पादन गरेको दूधसँगै बजारसम्म पु¥याउँदा त्यसबाट थप आम्दानी हुने शर्माले बताउनुभयो । त्यसका लागि नगरपालिकाले प्रोत्साहन गरिरहेको उहाँको भनाइ छ ।
एउटा भैँसीलाई ६५ देखि ८५ हजार मूल्यमा किन्नु परेको र गोठ निर्माणलगायतमा लगानी धेरै भएकोले केही समय लगानी उठाउने र त्यसपछि आयस्तर बढाउने योजना रहेको युवा व्यवसायी दीपेश ढकाललेबताउनुभयो । एक्लैले गर्दा लगानी गर्न नसकिने भएकोले सबै विदेशबाट फर्किएको युवाको सहभागितामा व्यवसाय सञ्चालन गर्नुपरेको उहाँको भनाइ छ ।