तलेजु भवानी मन्दिरको व्यवस्थापन सुरु
काठमाडौँ, असोज १६ गते । बडादसैँका अवसरमा महानवमीका दिन दुई लाखभन्दा बढी भक्तजन तलेजु भवानीको दर्शन गर्न आउने अनुमानसहित यहाँ व्यवस्थापन सुरु भएको छ । हनुमानढोका दरबार स्थित दसैँघरकम सोही अनुमानका साथ जमरा र टीका लिन आउनेका लागि पनि व्यवस्था गरिएको छ ।
दरवारका पर्वपूजा संयोजक मिठाराम पुडासैनीका अनुसार दसैँघरमा राखिएको जमरा र टीका विगतमा अपर्याप्त भएकोले यो पल्ट कमी नहोस् भनेर काम थालिएको छ । भूकम्पले भत्काएको तलेजु भवानी मन्दिरमा भक्तजनको सहज आवागमन व्यवस्था अपनाइएको छ ।
अंशवण्डा गरेर अलग वसेका, घर झगडा भई एकै थलोमा टीका लगाउन नचाहने, टुहुराले विशेष गरी हनुमानढोका दरवारस्थित सरकारी दसैँघरबाट टीका जमरा लगाउने गरेका छन् ।
मखन महादेव क्लव, सिन्ह स्वाँ खलः, गङ्गा क्लवलगायतका स्थानीय क्लवले तलेजु मन्दिरमा हुने भीडको व्यवस्थापन गर्ने भएका छन् । योपल्ट अन्य वेला भन्दा आधा घण्टा अघि नै तलेजु मन्दिर सर्वसाधारणका लागि खुला गरिँदै छ ।
पुडासैनीका अनुसार बिहान ४ बजे नै मन्दिर खुला हुन्छ भने यो बेला आउनेले मूलचोकमा हुने ५४ राँगा ५४ बोका बली हुने कालरात्रिको अवलोकन समेत गर्न पाउने छन् ।
नासलचोक त्रिशूलचोक लगायतका ऐतिहासिक स्थलको पनि अवलोकनको व्यवस्था गरिएको छ । स्थानीय गङ्गा क्लवका अध्यक्ष दिनेशमान जोशीले क्लवले सो व्यवस्थापनलाई सहयोग गरिरहेको बताउनुभयो ।