सहयोगी हातहरू विपन्नको शिक्षाका लागि
अविनाश चौधरी / धनगढी, कात्तिक २८ गते । कैलालीको लम्कीचुहा नगरपालिका १ स्थित एकतानगर मुक्त कमैया बस्तीमा नमुना अध्ययन गृह निर्माण गर्नका लागि देश विदेशबाट सहयोग प्राप्त भएको छ ।
सामाजिक कार्यमा सक्रिय युवाले थालेको अभियानमार्फत विपन्न परिवारका बालबालिकाका लागि नमुना अध्ययन गृह निर्माण गर्न सहयोग प्राप्त भएको हो । मुक्त कमैया बस्तीमा रहेका झण्डै ५० बालबालिकाको शैक्षिक सुधारमा सहयोग पु¥याउने उद्देश्यले १३ जना युवा यो अभियानमा जुटेका हुन् ।
दिन प्रतिदिन सामाजिक सञ्जालको दुरुपयोग भइरहँदा लम्कीका केही युवाले भने यसलाई सदुपयोग गर्दै सहयोग अभियान चलाएका छन् । सामाजिक सञ्जालमार्फत थालेको अभियानबाट हालसम्म पाँच लाख ५० हजार ८२० रुपियाँ सहयोग जुटेको छ । युवाले अभियानलाई जारी राखेका छन् ।
अभियानको क्रममा नेपालको विभिन्न जिल्लामा रहेका मनकारीहरू र विदेशमा रहेका नेपालीबाट सहयोग प्राप्त भइरहेको अभियानमा सक्रिय सिर्जनशील नेपालका अध्यक्ष जनक सुनारले जानकारी दिनुभयो । अहिलेसम्म ४० जिल्ला र विदेशमा नेपाली जुन–जुन देशमा हुनुहुन्छ, त्यहाँबाट सहयोग प्राप्त भइरहेको छ, उहाँले भन्नुभयो ।
मुक्त कमैया बस्तीमा नमुना अध्ययन गृह बनाउनका लागि रुकुमको आठबीसकोट नगरपालिका १०, घारी खोलामा घर भई हाल अमेरिकाको क्यालिफोर्नियामा बस्दै आउनुभएका प्रेम केसीले ३९ हजार ६७५ रुपियाँ सहयोग गर्नुभएको छ ।
मुक्त कमैया बस्तीमा नमुना अध्ययन गृह बनाउने कार्यको प्रशंसा गर्दै उहाँले विदेशमै अभियान चलाएर थप सहयोग जुटाउने प्रतिबद्धता समेत जनाउनुभएको छ ।
बेलायतमा बस्दै आउनुभएकी चितवनकी तिलकुमारी गुरुङले एक लाख रुपियाँ सहयोग गर्नुभएको छ । नेपाल आएको बेला उहाँले नमुना अध्ययन गृह निर्माण हुने बस्तीमै पुगेर एक लाख रुपियाँको चेक हस्तान्तरण गर्नुभएको थियो । अमेरिका बस्दै आउनुभएकी दाङकी लीला डाँगीले पनि एक लाख रुपियाँ सहयोग गर्नुभएको छ । यस्तै, अमेरिकामै रहनुभएका रुकुमका गोर्ख कुसारीले ५० लाख रुपियाँ सहयोग गर्नुभएको छ । दशैँ–तिहारको अवधिमा झन्डै तीन लाख रुपियाँ सहयोग जुटेको अभियानकर्मी सुनारले जानकारी दिनुभयो ।
बालबालिकाहरूको अध्ययनका लागि नमुना अध्ययन गृह निर्माणमा पुनर्वास नगरपालिकाले यसअघि नै ३६ हजार पाँच सय रुपियाँ सहयोग गरेको थियो । कैलालीका केही स्थानीय सरकारले सहयोगको प्रतिबद्धता जनाएको अध्यक्ष
सुनारले जनाउनुभयो ।
करिब १० लाख रुपियाँको लागतमा निर्माण हुने तीनकोठे नमुना अध्ययन गृहका लागि केही रकम उठेपछि निर्माण कार्यको शुरूवातसमेत गरिएको छ । अहिलेसम्म जग हाल्ने कार्य सम्पन्न भइसकेको अध्यक्ष सुनारले जानकारी दिनुभयो । उहाँले मङ्सिर पाँच गतेदेखि थप काम अगाडि बढ्ने उल्लेख गर्नुभयो ।