नयाँ वर्षमा पाइपबाट तेल
शिवशङ्कर मिश्र / बारा, मङ्सिर १४ गते । नयाँ वर्ष २०७६ को पहिलो साता पाइपलाइनबाट तेल भित्रिने दाबी गरिएको छ । अमलेखगञ्ज डिपोका क्षेत्रीय प्रमुख प्रदीप यादवले त्यसका लागि कार्य द्रुत रूपमा भइरहेको बताउनुभयो । भारतबाट नेपालका लागि आयात हुने पेट्रोल, डिजल र मट्टीतेलको मोतीहारी, रक्सौल हुँदै अमलेखगञ्जसम्म पेट्रोलियम पाइपलाइन परियोजनाको निर्माण कार्य भइरहेको हो ।
प्रतिघण्टा २५० लिटर पेट्रोलियम पदार्थ पाइपबाट भित्रिने र पहिलो चरणमा परीक्षणका लागि डिजेल आउने उहाँले जानकारी दिनुभयो ।
एक वर्ष अवधि राखिएको एक वर्षअघि शुरु भएको परियोजना २०१८ को अन्त्यसम्म पाइपलाइनको निर्माण कार्य सम्पन्न गरिने लक्ष्य लिएको थियो । त्यसका लागि अहिले समूह–समूहमा इन्जिनियरको टोली स्थलगत खटाइएको परियोजना तथा क्षेत्रीय प्रमुख यादवले बताउनुभयो ।
योजनाको कार्य पूरा गर्न कुनै बाधा, अवरोध नआए, बढीमा साढे तीन महिना अझ लाग्न सक्ने उहाँले भन्नुभयो । यो योजनाको लागत करिब तीन सय करोड भारु रहेको जनाइएको छ ।
पाइपलाइनको कार्य सम्पन्न भएपछि ट्याङ्कर मार्फत ढुवानी हुने प्रतिमहिना दुई करोड अर्थात वार्षिक २४ करोड नेपालको बचत हुने यादवले बताउनुभयो ।
यो बाटो भएर पेट्रोल ३१ करोड ७५ लाख ७५ हजार ४२४ लिटर, डिजल चार करोड ९७ लाख २५ हजार ६७३ र २९ लाख १४ हजार ८७२ लिटर मट्टीतेल वार्षिक आयात हुने गरेको निगमले जनाएको छ ।
एउटै खाल्डोमा पेट्रोल, डिजल र मट्टीतेलको पौने ११ इन्चको एमएस माइलस्टिल पाइप ओछ्याउने कार्य तीव्र गतिमा भइरहेको परियोजना कार्यालय, सिमराका प्रमुख इन्जिनियर शरदप्रसाद पौडेलले जानकारी दिनुभयो । बरौनीदेखि कानपुरसम्मको पाइपलाइनबाट पटना टर्मिनलमा पाइप बिछ्याउने कार्यको सर्भे पनि भइसकेको उहाँले बताउनुभयो ।
पटनादेखि मोतीहारी १५.४ किलोमिटर, मोतीहारीदेखि नेपाल बोर्डर ३२.७१५ किलोमिटर र बोर्डरदेखि अमलेखगञ्ज ३६.२०६ किलोमिटर दूरीको निर्माण कार्यमा २२ किलोमिटरमा पाइपलाइन बिछ्याउने कार्य सम्पन्न भइसकेको छ ।
१४ किलोमिटर मध्ये नौ किलोमिटर जङ्गल र पाँच किलोमिटर गण्डक चोकदेखि परवानीपुरसम्म बोरिङ मार्फत पाइप बिछ्याउने कार्य भइरहेको उहाँले बताउनुभयो ।
भारतीय आयल कार्पोरेसन लिमिटेड र नेपाल सरकारको संयुक्त लगानीमा रक्सौलदेखि अमलेखगञ्जसम्म ४१ किलोमिटरभित्र सार्वजनिक स्थलमा भौतिक पूर्वाधारमा क्षति पुग्ने भएकाले सो क्षेत्रमा बोरिङ प्रविधिमार्फत फेज÷फेज गरी पाइप गाड्ने काम भइरहेको इन्जिनियर पौडेलले जानकारी दिनुभयो ।
अहिले चार ठाउँमा जीतपुर, परवानीपुर तथा नेपाल–भारत सीमा क्षेत्रको वीरगञ्ज भन्सार एरिया स्थित रजत जयन्ती चोक र बाइपास क्षेत्रमा मेसिनको माध्यमबाट पाइप बिछ्याउने कार्य भइरहेको उहाँले जानकारी दिनुभयो ।